Press "Enter" to skip to content

Khur jingjop ka TNT Sputnik bad ka Riatsamthiah

Shillong League Super Division T20
Shillong, Lber 19: Ka TNT Sputnik bad ka Riat-samthiah ki la ioh ba kin khur ïa la ki jingjop ki jong ki, ha ka lympung ialehkai jong ka Shillong League Super Division T20 ba la long hynne ka sngi Hatmajai ha madan ïalehkai kriket ha JN Stadium Polo.
Ka jingjop kine ki artylli ki kynhun ka la wan hadien ba ki la lah ba kin pynliem ïa ka Langsning CC bad ïa ka United XI da 8 bad 7 wiket.
Haba phai sha ka jingïakhun ba nyngkong jong ka sngi, ka Langsning CC kaba la wan ba kan tied nyngkong, ka la lah ba kan kamai tang 78 ron hadien ba ka la hap baroh ki wiket ha ka 19.5 ober, u Larri Warjri u la lah ban kamai 20 ron na ki 18 tylli ki bol bad u Iohbynta Sanglyne 12 ron ba la wan na ki 19 tylli ki bol.
Ha lyndet ka jingkhyllem ki nongtied jong ka Riat-samthiah ka la wan na ka jinglah ban bol bha ka jong u Saurav Sharma uba la ioh ban khur 5 wiket naka bynta 19 ron na ki 4 ober.
Haba la wan ban beh ïa ka thong, ka TNT Sputnik ka la lah ba kan kot ïa ka ha ka 11.3 ober hadien ba ka la hap noh tang 2 wiket bad ban kamai 80 ron, u Amit Singhania u la lah ban kamai 21 ron bad u Abhay Negi 20 ron.
Ha ka jingïalehkai kaba ar jong ka sngi, ka United XI kaba la wan ba kan tied nyngkong, ka la lah ba kan kamai 121 ron hadien ba ka la hap noh 6 wiket na ki 20 ober, u Jason Lamare u la lam khmat ïa ka kynhun ban kamai 53 ron ba la wan na ki 52 tylli ki bol bad u Yogesh Tiwari 19 ron na ki 16 tylli ki bol.
Haba la dei pat ka pali ban wan ban beh ïa kane ka thong ka Riatsamthiah CC ka la lah ba kan kot ïa ka ha ka 14.2 ober hadien ba ka la hap noh 3 wiket bad kamai 125 ron, u Anish Charak u la lah ban kamai 68 ron ba la wan na ki 35 tylli ki bol bad ïai neh haduh kaba kut ban bynrap lang da ka 17 ron na ki 14 tylli ki bol jong u Ibitlang Thabah ka la seng ïa ka nongrim ba khlaiñ bha ïa ka Riatsamthiah ba kan jop suk pat ïa kane ka jingïakhun da 7 wiket.