Press "Enter" to skip to content

Shah jied ka Mawnai kum ka 1st Digital Village ha West Khasi Hills

Mawnai: Ka Mawnai, ka Shnong kaba don ha lynti ban leit sha Lum Kyllang, West Khasi Hills District, ka la shah jied ha ka sorkar India kum ka Digital Village ba nyngkong eh ha West Khasi Hills District. Ha Meghalaya ki don 11 tylli ki Digital Village bad ka Mawnai kadei kaba nyngkong eh ha West Khasi.
Digital Village, ka mut ka Shnong ba ban treikam beit da ki Computer ha kiba bun ki liang ne kata ka e-Governance, kaba ki paid nongshongshnong kin pyndonkam beit da ka internet ne online haba kiba bun ki bynta.
Namar kane ka jingshah jied kum ka Digital Village, ka sorkar kan kyrshan ïa kane ka Shnong da kaba ka free training halor ka jinghikai Computer, nangta pyndonkam WI-FI, nangta ki jingthep form online, ka jingtreikam ki Bank, ki Solar Light LED,k ka jinghikai skul lyngba ki digital technology bad kiwei kiwei de ki kam lyngba ki Common Service Centre.
Na ka liang ka sorkar pdeng ka la buh thong ba ha kine ki shi snem ban wan lyngba ka Ministry of Electronic and Information Technology kan jied shi lak tylli ki shnong ban pynkylla kum kita ki Digital Village ha ri India. Ïa ka Mawnai la jied ryngkat ka jingïatreilang i Kong R. Kharsyntiew, VLE jong ka Digital Seva E- Governance CSC Mairang.
Kane ka jingshah jied ka Shnong, ka la pynkmen shibun ïa ki paidbah jong ka Shnong bad ha ka sngi Palei, la pynlong ïa ka jingïalang kum ka dak ban plie ïa kane ka Digital Village, ha kaba u SDO jong ka Mairang Civil Sub Division, u Bah A. Nongbri, u la long u Kongsan. La ïadon lang ruh u BDO Mairang C7RD Block, Bah V. Swer, Bah M. Diengdoh, EAC Mairang, Bah B. Khongjoh, State Head jong ka E- Governance CSC, Bah M. Japang, BM ka SBI Mairang, Bah S. Marbañiang, Sordar Shnong Mawnai bad kiwei kiwei.
La pynshongkun ïa kane ka sngi da ka jingïadon lang ruh ki paidbah nongshongshnong ka Shnong Mawnai.
Ki nongkren ha kane ka jingïalang, ki la pynpaw ka jingsngewkmen ba kum kane ka kabu ka la wan ha ka shnong Mawnai, ka shnong kaba don kham sha kyndong. Ki la ong ruh ba lyngba kane ka jingïoh lad na ka sorkar pdeng, kan long ka jingïarap kaba khraw ïa ki paidbah, ha kaba pynsuk ïa ka jingtreikam jong ki khamtam ha kane ka juk, ha kaba ka jingtreikam long beit lyngba ka Internet bad Online.