Press "Enter" to skip to content

Pynbna ka BJP ïa ka kyrteng u Bah Sanbor ban ïakhun MP na Shillong

Shillong: Ka Seng BJP ka la pynbna ïa ka kyrteng jong u Bah Sanbor Shullai, MLA jong ka South Shillong ban long kum u Kyrtong ka Seng na ka bynta ban ïakhun ïa ka elekshon MP na 1- Shillong Parliamentary Constituency.
Ïa ka kyrteng u Bah Sanbor la pynbna ha ka sngi Saitjaiñ, haka thup kaba ar jong ki kyrtong ka BJP ki ban ïakhun ïa ka elekshon Lok Sabha kaban sdang naduh u bnai ïaïong mynta ka snem. Ka Seng kam shym la sei kyrtong satia na 2- Tura Parliamentary Constituency bad kan kyrshan ïa ka kyrtong jong ka NPP, ka Agatha Sangma.
U bah Sanbor Shullai u dei uwei na ki 36 ngut ki kyrtong bala mynjur da ka Central Election Committee (CEC) bala pynïaid da u President u Amit Shah ha ka jingiadonlang u Myntri Rangbah Duh ka Ri, Narendra Modi hynne ka sngi ha Delhi.
U bah Sanbor un ïakhun pyrshah ïa u MP bala arsamoi jong ka Congress ma Vincent H Pala bad u Nongïalam ka UDP u Dr Jemini Mawthoh uba dei u kyrtong monlang ka kynhun synrop Meghalaya Democratic Alliance(MDA) lem bad ki kyrtong shimet.
U Bah Sanbor Shullai, udei u riew thymmai ha ka Seng BJP, namar u dang shu rung tang khyndiat sngi shuwa ban long ka elekshon MLA ha u 2018. U la jop MLA nyngkong eh ha u 2008 kum u Independent. Ha u 2013 u la ïakhun noh na ka Seng NCP. U la ong teng u Deputy Speaker hapoh ka sorkar Meghalaya United Alliance 2, ha shuwa ba un shah phah hiar shuki noh ha ka por ba ka sorkar u Dr. Mukul Sangma ka don hapdeng ka jingshong syier na ka jingthmu tyrwa jingbym shaniah ka Liang Pyrshah, kaba ha katei ka por ka kynthup ïa ka UDP, HSPDP, NPP, BJP bad Independent.
Haba u la jop biang ha ka snem 2018 na ka Seng BJP, um shym la ïoh shuki Myntri namar ïa ka shuki Myntri la ai noh sha u Bah AL Hek, uwei na ki MLA ba la kham ranbah ka seng BJP ha Meghalaya, uba la wan phai biang hadien ba u la leit ïasoh shipor ba ka Seng Congress. Mynta u bat kum uwie na ki Chairman ha ki Corporation ka sorkar jylla. Shuwa ba un jop MLA, u la long MDC la bunsien ha KHADC na ka Laban- Mawprem Constituency.
“Ngi la phah lut ïa ka kyrteng jong baroh ki Nongïalam bad ka CEC kala jied ïa u Bah Sanbor ban long u kyrtong jong ka Party na Shillong Constituency ha ka elekshon MP Lok Sabha” ong u Bah Shibun Lyngdoh, President ka BJP haba ïakren bad ki nongthoh khubor.
Haba pynpaw ïa ka jingsngew skhem ba ka Sorkar NDA ba ïalam da u Narendra Modi kan wan phai biang sha ka bor, une u Nongïalam ka BJP ula ong “Nga kwah ban kyrpad ïa baroh ki paid Khasi bad Jaiñtia ba kin vote ïa ka BJP namar ka mat trei kam jong ka BJP ka dei tang ka kam pynroi, kam pynroi bad kam pynroi”.
“Nga kyrpad ïa ki paidbah ka Shullong Constituency ban vote ïa u Bah Sanbor khnang ba un shimkhia ïa ki jingeh bapher bapher ba ïakynduh daki paidbah ka Jylla bad ban ïasaid ruh ha Ïingdorbar Parliament” ong u Bah Shibun.
Haba ïadei bad ka jingbym pynieng kyrtong na Tura, une u Nongïalam ka BJP ula ong “Ka rai ban nym pynieng kyrtong na Tyra ka dei kaba la shim da ki Nongïalam na Delhi bad kam dei satia ïa nga ban kren eiei. Ngi la dep phah ïa 4 tylli ki kyrteng hynrei ki sngew ba ngin dei ban sei kyrtong stia bad kane ka dei ka rai”.