Press "Enter" to skip to content

T.72 hajar shi snem sha kiba duk tam, kular ka Congress ha ka elekshon MP

New Delhi: U President jong ka Seng Congress, u Rahul Gandhi, u la kular ba lada ka Seng ka wan ha ka bor kan ai jingïarap 72 hajar tyngka shi snem ïa ki paidbah kiba duk napdeng kiba duk tam.
Haba ïakren bad ki nongthoh khubor hadien ba la wai ka jingïalang jong ka Congress Working Committee (CWC) ha nongbah Delhi, u Rahul, u la ong ba kane ka pisa kan leit beit sha jingkynshew (account) jong ki paidbah ha ki Bank bad kane kan long 20 percent sha ki paidbah baduk tam ha ri India.
Haba batai pynshai ïa kane, u Rahul u la ong ba lada ka longïing ka ïoh ban kamai 6 hajar tyngka shi bnai, kaba sha 6 hajar yn ai da ka sorkar sha ki account jong ki.
Ïa kane ka jingïarap pisa sha kiba duk tam la ai kyrteng ka Nyuntam Aay Yojana (NYAY) kaba mut “Ka jinglehhok” bad ïa kane ka kyrteng ka ai da ka para jong u, ka Priyanka Gandhi.
“Ka Seng Congress kam lah ban pdiang ha ha kane ka spah snem kaba arphew wei yn dang don ki briew kiba duk tasam”, la ong u Rahul.
U la ong ba katkum ka jingkheiñ ka la kheiñ bha, kane ka NYAY kan pynmyntoi kumba 5 klur tylli ki longïing ha ri India. U la ïathuh ka Seng ka la ïakren bad ïatai bha ïa kane ka skhim mynta la saw ne san bnai. “Ngi la kular ban ïarap ïa ki paidbah lyngba ka MNREGA, ngi la leh bad ïa ka NYAY ruh ngin pynurlong”, la ong u nongïalam ba heh duh ka Seng Congress.
Hynrei ïa kane ka jingpynbna u Rahul Gandhi, la beiñ da ka Seng BJP, da kaba ong ba kadei tang kaba shu pynbieit paidbah. U Myntri tnad platyngka jong ka sorkar pdeng, u Arun Jaitley, u la ong ba ka Seng Congress kadei ka seng kaba ju mlien ban pynbieit ïa ki paidbah. “Ka jingduk jingkyrduh ka la don ha India nadu ba sdang synshar ka Indira Gandhi ruh”, la ong u Jaitley, da kaba ban ruh ba ha u 2008 ka la kular ban ai ram 72 hajar tyngka sha ki nongrep, hynrei ka la ai tang 58 hajar tyngka.