Press "Enter" to skip to content

Hikai ïa ki khun ban ym ngop ha ki jingsniew, kyntu ka DC

Mawkyrwat, Lber 27: Ka Deputy Commissioner jong ka South West Khasi Hills District, Kong I Laloo ka la kyntu ïa ki kmie ki kpa ki dei ban hikai bad pyni ha ki khun ïa ka lynti kaba dei khnang ba kin nym ngop ha ki jingsniew.Ïa kane ka la pynpaw ha ka rally ba la pynbeit da ka Synjuk ki Rangbah Shnong Rangblang Area (SRSRA) halor ki lai tylli ki phang kata ban pyrshah ïa ka kyiad, drug bad ki kam batbor ba la pynlong ha ïew Rangblang.
Ka DC ka ong ruh ba, “Ki khynnah skul, ym dei ba ki ïoh jingstad tang na skul ba ki pule hynrei ki peit thuh ruh ïa ka ïaid ka ïeng, ka kren ka khana, ka riam ka beit jong kiba la san”. Ka la kyntu ruh da kaba ong, ba ki don kiwei kiwei ki kam lada lah ban trei ne leh bad ymdei ban shu shim tang ïa ka kam shet kyiad ne die kyiad namar kane ka long beaiñ. “Ka jingshong suk shongsaiñ ka long kaba donkam eh ha kine ki sngi ba mynta”, ong ka kong I. Laloo, IAS bad bynrap ruh ba ki paidbah nongshong shnong kim dei ban pyrkhat ba tang ïa ka mynta hynrei kin pyrkhat khamtam ïa ka lashai na ka bynta ka jingbha jong ki khun ki kti.
“Shim ïa kaba bha, pyndonkam ïa kaba bha, kiar na kaba sniew bad ban rad dyngkhong syndon ïa ka ym tang da ka ktien hynrei lyngba ki kam”, la bynrap ka kong I. Laloo, IAS. Ha kajuh ka por ka la kyntu ruh ba lada ki shnong ne ki paidbah ki donkam jingïarap kin sngewbha ban mih shakhmat khlem kano kano ka jinglehraiñ ban long kiba ïatreilang khnang ba ki jingsniew kin ym lah shuh ban mih shakhmat hynrei kin nangtroiñ bad kin duh kin dam noh syndon.
Ha ka jingkren jong u bah P. Paslein, DSP ka South West Khasi Hills District ula ong ba ka kyiad ka sdang hi na ïing bad haba ka la sdang bunsien ka pynsniew bad pynjot ym tang ha kawei ka longïing hynrei hapoh ka imlang ka sahlang hi kumjuh. Shuh shuh na ka liang u bah P. Paslein ula ai ruh ka jingkyntu na ka bynta ki kmie ki kpa ba kin pynsngewthuh ne peit thuh bha ïa ki khun ki kti khnang ba kin lait na ki jingdih kiba pynsniew ïa ka jingim jong ki da kaba pyni nuksa ba bha, ym ban shim ïa ka lynti kaba bym dei namar ba haba kum ki kmie ki kpa ki shet ne die kyiad ki khun lei lei kin bud beit namar ba da lade hi ki kmie ki kpa ki la hikai. “Dei ki nongdih kyiad bad nongdih drug hi bunsien ki ju pynkulmar lane batbor ïa ki kynthei”, ong u bah Paslein da kaba bynrap ruh ba ha kine ki sngi na ka liang ka tnad Pulit ki dang ïai wad ïa ki nongshet bad nongdie kyiad khnang ban rad dyngkhong ïa kane ka kam kaba pynsniew ïa ka imlang ka sahlang.
“Kane ka dei ka sien ba nyngkong eh ba kum ka Synjuk ki Rangbah Shnong ki la shim ban pynlong ïa kum kane ka program ban pyrshah ïa ka kyiad, drugs bad ki kam batbor “, ong u Pastor A.T. Lyngdoh Marshilong, uba dei peit ïa ka Balang Presbyterian Rangblang. Ka kyiad ka teh mraw ïa u ne ka briew kiba ju mlien ban dih bad bunsien ka pynjngai ruh ha ka jingïadei bad ka ïing ka sem, ka imlang sahlang bad khamtam eh ka pynjngai ruh ha ka jingïadei bad U Blei.
Kiba la wan ïashimbynta ha kane ka sngi ki kynthup ïa ki Synjuk ki Rangbah Shnong, ki Seng Longkmie jong ka Rangblang Sohsynïang, ki khynnah skul jong ka Morning Star Secondary School, Ladjynrai, ka Bashiba U.P. School, Rangblang Laitdom, ka Rangblang Presbyterian Secondary School, Rangblang bad ka Umsait Shriew LP School ha kaba la pynlong ruh ïa ka jingïaid paidbah ha ryngkat ka jingpyrta ban pyrshah ïa ka jingdie bad dih kyiad, ïa u Drug bad ka kam batbor ne thombor kaba la sdang naduh Ladjynrai bad pynkut ha ïew Rangblang ka jaka ba pynlong ïa ka jingïalang.
Ki nongkren ha kane ka sngi ki kynthup ïa ka kong Disimora na ki Seng Longkmie, u Pastor A.T. Lyngdoh Marshilong, uba dei peit ïa ka Balang Presbyterian Rangblang, u Fr. Stephen Kharbani, Parish Priest Rangblang.