Press "Enter" to skip to content

Kam u Dr. Mukul ba tang ka Congress ba lah ban ïakhun ïa ka BJP

Shillong, Lber 29: U Kyrtong ka Congress na Tura Lok Sabha Constituency Dr Mukul Sangma hynne ka sngi ula kam ba tang ka Congress Party kaba lah ban ïakhun pyrshah ïa ka BJP haba kyntu ïa ki paidbah ba kin wanrah biang ïa ka Party lem bad ïa u kum u MP ban synshar ïa ka Ri.
Une u Myntri Rangbah barim ka Jylla ula kren ïa kane ha ka jingïalap elekshon jMP-Lok Sabha ha South Garo Hills, ha ka jingleit iuhkhat ha ki thaiñ Rangsakona bad Gandhipara.
Ka jingïalap elekshon jong ka Tura Lok Sabha Constituency kala shongshit bha mynta bad na ka liang ka Congress bad ka NPP kila pynlong ïa shibun ki rally ha kylleng ki jaka ban pan ïa ka jingkyrshan na ki Nongthep Vote.
“Ki paid Nongshongshnong ka Ri kila im syllang bha naduh ba shimti ka Sorkar u Modi mynta la san snem. Kila shah ban beiñ ha ki aiñ bala thaw da kane ka Sorkar kiba long pyrshah ïa u paidbah. Lada ym dei ba don ka Congress, ka Sorkar BJP kan jin da pyn bor ïa ngi baroh da ki Aiñ bad ki kyndon ba laiphew jait” ong u Dr Mukul Sangma ha ka rally ba long ha Rangsakona.
Une u kyrtong ka Congress ula kam ba ki paidbah mynta kila phaikhmat bha sha ka Congress hadien ba kila sdang sngewthuh ïa ki jingeh bad ki jingjynjar ba ki mad hapoh ka jingsynshar jong ka Sorkar NDA ba lamkhmat da ka BJP.
U Dr Mukul ula ai ruh ka jingbatai halor ka skhim T. 72000 shibnai ba ka Congress ka kwah ban ai sha ki Longïing kiba duk tam jong ka Ri haba pan lem ïa ka jingkyrshan ban lah pynurlong ïa kane ka kam. Ula kren ruh halor ka jingïaid shakhmat jong ka Jylla ha ka roi ka par naduh ba u shimti ïa ka shuki kum u Myntri Rangbah ka Jylla.
“Ngi la wanrah ïa ki kam pynroi ha ka Jylla bad ki paidbah ki tip bha ïa ki skhim ba ngi la pyntreikam. Mynta bala wan ka sorkar thymmai, ki paidbah kin bishar ïa ka lyngba ki kam” ong u Dr Mukul uba dei ruh u Nongïalam ka Liang Pyrshah ha Jylla.