Press "Enter" to skip to content

Leh aiu ki MP ka Congress baroh shikatta snem ïa ka Meghalaya: Dr. Jemino

Shillong, Lber, 30: U kyrtong monlang jong ka Meghalaya Democratic Alliance, u Dr. Jemino Mawthoh u la kynthoh tyngeh ïa ka Congress kaba la ïai kynthoh na ka sngi sha ka sngi ïa ki seng saiñpyrthei riewlum, da kaba ong, “ki leh aiu ki MP ka Congress baroh shikatta ki snem ïa ka Jylla Meghalaya.”
U Dr. Jemino u la kynthoh ïa ka Congress ha ka jingïalang paidbah kaba la long ha Mawlai mynta ka sngi saitjaiñ.
“Ngi la jied ïa ki MP na ka Seng Congress hynrei ki leh aiu baroh shikatta ki snem ïa ka Jylla Meghalaya. Kiei kita ki kam kiba khraw kiba ki MP ka Congress ki leh. Hato u MP ba mynta ka Congres (Bah Vincent H. Pala) u la kren neem ban pynïoh ïa ka jingïada ïa ki rit paid, hato u la kren neem halor ki jingïajia pud, u la kren neem halor ka jingpynrung ïa ka ktien Khasi ha ka 8th Schedule ka Riti Synshar jong ka ri India,” la kynthoh u Dr. Jemino.
Haba pynksan ïa ki Seng Riewlum, une u kyrtong monlang ka Meghalaya Democratic Alliance u la ong, “u Prof GG Swell u dei u MP na ka Meghalaya uba la mih na ka seng riewlum bad ki kam kiba u la leh ki long kiba khraw haduh katta katta. Ha Delhi u la ïasaid ban pynïoh Jylla ïa ka Meghalaya, u la kren na ka bynta ban pynïoh ïa ka skulbah NEHU, u la ïasaid ruh halor ka jinglong trai ïa u dewiong da ki trai khyndew ka jylla.”
“Kan dei ka sien kaba nyngkong eh ba ka Jylla Meghalaya kan sakhi ïa ka jingïatylli lang jong ki seng riewlum ha kane ka kynti ban ïatreilang na ka bynta ban sei ïa u kyrtong monlang da ka jingïasngewthuh jingmut jong ki Nongïalam jong ki saw tylli ki seng riewlum,” ong u Dr. Jemino
“Kane ka dei ka jingpyrshang kaba la bun bun snem kaba ki paidbah ki la angnud ban ïohi noh ïa ka jingïatylli lang jong ki seng riewlum,” u la ong.
Haba kynthoh shuh shuh ïa ka Sorkar Meghalaya United Alliance (MUA) ba la ïalam da ka Congress u Dr. Jemino u la ong, “ngi ïohi tang ïa ki sohkyrdot haba ka Sorkar Congress ba la ïalam da u Dr. Mukul Sangma kum u Myntri Rangbah uba la pynsniewdur ïa ka ïoh ka kot, ka roi ka par ha kaba bun tang ki jingïakhih bad ka jingud jong ki nongrep, ki nonghikai, ki nongtrei sorkar bad kiwei kiwei.
“Ka jingïakhhun jong nga ha kane ka kynti ka dei hapdeng ka Congress pyrshah ïa ka MDA hynrei ym dei satia ka Congress pyrshah ïa ka UDP, kumba la kynnoh u Bah Vincent Pala,” la pynshai u Dr. Jemino.
U la ong ruh ba katkum ki jinglum jingtip, ka Indian National Congress kan ym pat ïohlad ban thaw ïa ka Sorkar ha Delhi hadien ka Elekshon Lok Sabha namarba ka Congress ha ki san snem baladep, ka la don sa tang 44 ngut ki MP ha ka Iingdorbar Thawaiñ Lok Sabha kaba don 543 ngut ki MP.
Une u Kyrtong ka MDA u la ong, “balei ngin sngap ïa ka sur na Delhi, hynrei ngi dei ban sngap ïa ka sur jong ki seng riewlum namar ngi kham sngewthuh kham bha ïa ki jingeh jong ngi. Dei ma ngi ki ban shna aiñ namarba u paidbah u kwah ba ngin ïa tylli ban shna ïa ki aiñ kiba skhem ki bym don jingïatakhuh bad ka Iingbishar lane bad ka Riti Synshar ka ri India.”