Press "Enter" to skip to content

Pan jingshai ka SC na ka ECI halor ki kyrtong ba don dak sniew

Delhi, Lber 30 : Ka Supreme Court ha ka sngi thohdieng, ka la pan jingshai na ka Election Commission of India bad na ka sorkar pdeng, halor ka jingujor ba ki la pynkheiñ ïa ka hukum jong ka ïingbishar ha kaba ïadei bad ka jingpynbna paidbah ki kyrtong ba ïaleh MP halor ki kam sniew jong ki.
Ka jingujor ka long ba ka ECI ka la pynkheiñ ïa ka hukum jong ka ïingbishar ba la pynmih ha ka 25 tarik u Nailur 2018, ha kaba la bthah ba baroh ki kyrtong kiba don dak sniew, kidei ban pyntip sha ka ECI bad ïa kine ki kam sniew dei ban pynbna paidbah ïar lyngba ki lad pathai khubor.
Ka ïingbishar ka la pan jingpynshai ruh na ki lai ngut ki election commissioner,
u law secretary bad u cabinet secretary, namar ba kim shym la pyntreikam ïa katei ka hukum ba la pynmih ha u snem 2018.
Nangta ha ka ha ka 10 tarik u Risaw 2018, ka EC ka la pynbna paidbah halor ka jingpynkylla ïa ka Form-26, bad bthah ïa baroh ki Seng saiñpyrthei bad kyrtong ban pynbna paidbah ïa ki kam sniew jong ki.
Hynrei ka jingujor da u Ashwini Kumar Upadhyay, uba long u nongsaid aiñ, ka kynnoh ba ka ECI kam shym la pynkylla ïa ka Election Symbol Order, 1968 ne ïa ka Model Code of Conduct (MCC) bad kumta kane ka jingpynbna paidbah kam ïeng satia.
Shuh shuh ka jingujor u Upadhyay ka la ong ba ka ECI kam shym la kdew ha kino ki lad pathai khubor dei ban pynbna ne ha ka por aiu. Kane ka la pynlong ïa kiba bun ki kyrtong ban pynbna ïa ki kam sniew jong ki ha ki kot khubor kiba rit baria ki bym ïaid ïew bad ki la pynbna ruh ha ki lad pathai khubor TV ki bym don ba peit satia.
Ha ka 10 tarik u Lber, ka ECI ka la pynbna ïa ki tarik ban long elekshon, khlem da pynkylla pat ïa ka Election Symbol Order bad ka Model Code of Conduct, kaba long kaba donkam na ka bynta ban pyntreikam ïa katei ka hukum ba la pynmih ha ka 25/9/2018, la ong ka jingujor une u nongsaid aiñ.