Press "Enter" to skip to content

Thoh sur poitri u samla ïa ki jingïakynduh marmet ha ka jingim

Shillong, Lber, 30: Ban pynsah kynmaw ïa ki jingïakynduh ba marmet ha ki jingim, u Samla Lurshaphrang Shongwan u la thoh ïa ki sur jingrwai poitri kaba u la lah ban pynmih pyrthei mynta ka sngi saitjaiñ.
Ïa kane ka thup ki sur jingrwai Poitri ba la ai kyrteng, “The Silent Songs’ la pyllait paidbah da u Executive Member ka Khasi Hills Autonomous District Council (KHADC), u Bah Paul Lyngdoh uba la long u kongsan ha kane ka jingïalang kaba la long ha Shillong Club, Shillong.
U Bah Paul haba kren kum u Kongsan u la ong, “ngi im ha kane ka juk kaba ka ktien ka thylliej ka don jingma namarba ki paidbah ki thoh lyngkot ïa ki kyntien. Ngi hap ban pynmlien ïalade ban kiar na kaba thoh lyngkot ïa ki kyntien namar kane kan wanrah ïa ka jingmynsaw ha ka ktien ka thylliej kaba ngi kren bad ngi pyndonkam manla ka sngi”
U la ai jingïaroh ruh ïa u samla Lurshaphrang uba la lah ban lum thup ïa kine ki sur jingrwai poitri da kaba pynmih ha ka dur jong ka kot ki ban long kum ki jingpynsah kynmaw ba pateng la pateng bad ki ban ai jingmyntoi ruh ïa ki nong pule.
U Samla Lurshaphrang u la ïathuh naduh ba u dang don 7 snem ka rta u ju don ka jingsngewtynnat ban kynud ïa ki sur poitri mynba u dang long tang u khynnah rit uba dang shu sdang ban leit skul.
“Dei naduh u snem 2013 ka mynsiem ka la ktik ba nga dei ban thoh ïa ki poitri kiba mih hi na ka mynsiem bad ka jingmut jingpyrkhat jong nga. Ki sur jingrwai poitri kiba nga la thoh ha kane ka kot ““The Silent Songs” ki dei kiba pynsngewtynnat ïa ki nongpule bad kiba ktik ruh ïa ki jingmut jingpyrkhat jong ki paidbah namar ki don ki poitri kiba nga la thoh kyrpang kiba long kumba peit ïa ka phlim katba dang ngam jylliew,” u la ong.
U la ong ba ki sur jingrwai poitri kiba don ha kane ka kot kaba 38 sla ki dei kiba u la thoh shaphang ka jingieid, ki khanatang, ki jingïadei shi iing shisem bad kumjuh ruh kiba ïadei bad ka imlang ka sahlang.