Press "Enter" to skip to content

Pynkup bor ka Hima 12 Lyngdoh ïa u Rangbah Shnong ka Pahamlapong & Pahamsohthri

Nongpoh, Lber 31: Kumba ka Hima 12 Lyngdoh Elaka Nongpoh Sirdarship ka la pynim biang ïa ka riti ka dustur ba ka Spong ka Phali ka dei kawei na ki itkiar ban pynkupbor bad pynskhem ïa kino kino ki nongsynshar shnong bad ki It ki Hima shuwa ba kin shim ïa ka jingsynshar ba pura kum ki nongsynshar shnong, ka Hima 12 Lyngdoh, Elaka Nongpoh Sirdarship ka la pynskhem pura ïa u Rangbah Shnong ka Pahamlapong bad Pahamsohthri ryngkat bad ki dkhot ka Executive Committee.
Katei ka jing pynskhem ka dei ruh hadien ba ki paidbah nongshong shnong ka Pahamlapong bad Pahamsohthri ki la jied thymmai ïa ki nongïalam shnong hadien ba ka samoi treikam jong ki nongïalam barim ka la kut noh bad na ka liang ka ophis u Sirdar ka Elaka Nongpoh Sirdarship u la wan ruh ban pynskhem ïa u Bah Mathew Makdoh kum u Rangbah Shnong ba thymmai ka shnong Pahamlapong bad Pahamsohthri ba ki paidbah ki jied ryngkat ki dkhot ka Executive Committee.
Ïa kine ki nongïalam la pynskhem ha ka jingïalang kaba la long ha ka Sngi Saitjaiñ ha ka shnong Pahamlapong ha kaba u Sirdar ka Nongpoh Elaka Sirdarship, u Bah Wanphrang Syiem kum u kongsan u la wan ban pynkup ïa ka spong ka phali bad aiti ïa ka Sanad kum ka jingpynkup bor bad pynskhem ïa u Rangbah Shnong ba thymmai ka Pahamlapong bad Pahamsohthri bad kynthup ïa ki dkhot ka Executive Committee jong u ha shwa ba kin shim pura ïaka kam bala bynshet haki ryngkat ka kyrkhu ka kyrdoh.
La sakhi ruh ha katei ka sngi da ka jingdon lang u Bah J Lyngdoh Acting Lyngdoh ka Raid Nongpoh u ba la shim ruh ka bynta kum u symbud kongsan, Bah Stoin Syngkli Myntri ka Hima bad kiwei kiwei ki riew rangbah, ki longkmie bad samla jong ka shnong.
U Bah Wanphrang Syiem Nongshai haba kren ha katei ka sngi u la pynpaw ka jingsngewkmen kaba khraw bakum ka shnong ka dei ka sien ba nyngkong bala shim ïa kum katei ka sienjam ban pynkup bor ïa u Rangbah Shnong katkum ka riti dustur bala buh naduh kulong kumah ryngkat ka spong ka phali ryngkat ka jingaiti syndon ïaka Sannad kaba kdew shai bala ithuh ïa u da ka Hima kum u Rangbah Shnong jong katei ka shnong kaba hap hapoh ka jing synshar jong ka Hima.
U la ban khia ruh ïa ki paidbah nongshong shnong ba kim dei ban klet ïa la ka riti ka dustur bad ka jinglong tynrai jongki. U la ong ruh ba kane ka jingpynkup ne pynspong ïa ka spongka phali ka dei kawei na ka riti tynrai kaba la duh la dam la bun bun snem ha ka it ka hima.
U la ai ruh ka jingkyrkhu kyrdoh ïa u Rangbah shnong ba thymmai ryngkat bad ka kynhun ki nongïalam shnong ba kin lah ban trei kham bha ïaka kam kumba la bynshet haki bad kyrmen ruh shibun ki jingkylla kin wan lyngba kitei ki nongïalam ba thymmai bad bastad.
Na ka liang u Bah Mathew Makdoh Rangbah Shnong ba thymmai ka shnong Pahamlapong bad Pahamsohthri u la ong ba kane ka dei ka sien ba nyngkong ha katei ka shnong ban pynkup bor ïa u Rangbah Shnong katkum ka riti dustur kaba long ruh kum ka nuksa ïakiwei pat ki shnong ba kim dei ban klet ïaka riti dustur kaba long ka tynrai jong ngi.
U la ong ruh kum u rangbah shnong ba thymmai u don shibun ka thong ba kynthup ïaka khuid ka suba, ka jingrung kyrthep ki mynder, ka jingpynïaid bad khuid haki kam shnong kam thaw bad kumjuh ban wanrah ki jingkylla bad ka roi ka par, bad ïa kine baroh lah ban wanrah tang lada ki paidbah nongshong shnong ki ai ka jingïatreilang bad ïatylli ha shnong ha thaw.
U la kyntu ruh ïaki paidbah ba kin ai ka jingïatreilang ha baroh ki liang ban wanrah shibun ki jingkylla hapoh shnong kumba la angnud ba kane ka shnong kan long kum kawei naki nuksa sha kiwei pat ki shnong haki liang baroh, u la bynrap.
La pynphuh pynphieng ruh ha katei ka sngi da ki jingshad tynrai bad ki jingrwai bala shimbynta da ki nongshad ka Hima bad samla shnong.