Press "Enter" to skip to content

Khlad hashen i khynnah 5 snem ba tynrah ka trok ha Umdang

Nongstoiñ, Ïaiong 3: Iwei i khynnah kynthei ba dang 5 snem karta ba la tip kyrteng ka Endrisa Rongrin na ka shnong Umdang, i la khlad hashen hadien ba ka trok kaba don ïa u number AS 01 CC 4992, ka la pynher khlem akor bad tynrah ïa katei ka khynnah ha katei ka shnong.
La ïathuh ba kane ka jingjia ka la jia hynnin ka sngi ha ka por kumba 3:30 janmiet ha ka shnong Umdang. La ong ba ki don ar tylli ki trok kiba mih na Shallang ban leit sha thaiñ Riangdo. Hynrei mar ïa poi ha katei ka shnong Umdang, katei ka trok ka la shim pass ïa ka trok number AS01 CC 3027 bad ha kane ka jingshim pass jubor, ka la leit ban tynrah beit ïa katei ka khynnah kaba don harud surok.
Hadien ba la tynrah, katei ka trok ka la phet krad bad na ka liang ki nongshong shnong ki la ïoh ban bat tang ïa katei ka kawei ka trok. Ki bor shnong ki la pyntip ruh sha ki pulit halor kane ka jingjia bad hadien ba la poi ki pulit la rah ïa ka met ïap sha Hospital na ka bynta ka post mortem.
Shuh shuh ki pulit ki la rah sha thanat ïa u driver jong ka AS01 CC 3027, u Lambok Rynshiang bad ha ka jingtohkit ki pulit, u la ïathuh ba um don jingtip ei ei ïa ka kyrteng jong u nongñiah jong katei kawei pat ka trok, hynrei u la shu ong ba ïa katei ka khynnah la tynrah da ka trok AS 01 CC 4992. Ki pulit ki la register case halor kane ka jingjia bad ka jingthwet bad ïohkem ïa utei u draibar shongshit ka la ïaid shakhmat.