Press "Enter" to skip to content

Tang ka BJP kaba lah ban wanrah jingkylla ha Meghalaya: AL Hek

Khanduli, Iaiong 03: U Myntri ka tnad Koit ka Khiah ka Jylla, u Bah AL Hek uba long ruh u MLA ka Bharatiya Janata Party (BJP) ula ong “Tang ka BJP kaba lah ban wanrah jingkylla hapoh ka Jylla. Ka BJP haka jingsynshar jong ka, kala wanrah shibun ki kam pynroi haka jylla kumjuh haka thain shatei lam mihngi baroh kawei”.
“Haka jingsynshar jong ka BJP naduh ka por u (L) Atal Behari Vajpayee ula lah ban maitphang bad wanrah shibun ki kam pynroi hapoh ka ri bad na ka bynta ka thain ka Shatei Lammihngi ula thaw ïaka Ministry of Development for North Eastern Region (DoNER) haba man la ki Ministry jong ka Sorkar Kmie ki hap ban ai shiphew percent na ka bynta ka thain shatei lammihngi”, la ong u Bah AL Hek haba kren haka jingïalang paidbah kaba long ha iew Khanduli, ka shnong kaba don ha khappud Meghalaya-Assam haba pan ka jingkyrshan jong u paidbah ban pynjop ïa u kyrtong MP Lok Sabha ka BJP u Bah Sanbor Shullai.
U la ong shuh shuh ba ka Sorkar BJP ka la pyndep ban shna bad ban pyntreikam ïa ka NEIGRIHMS, Shillong ïa kaba ka Sorkar Congress ka la shu ïeh khunswet da ki phew snem bad ka NEIGRIHMS mynta kala kylla long kawei na ki jaka sumar kaba paw haka ri bad kylla long ka jingkyrkhu ïa u paid nongshong shnong ka Jylla.
Haba kren shuh shuh u Bah Hek ula ong “ka Sorkar Jylla kala dep ïateh kular bad ka Sorkar Kmie ban shna ïa ka State of the Art Diagnostic Centre kaba shondur T. 20 klur tyngka ha Pasteur Institute, Lawmali ha Nongbah Shillong. Ha kane ka Diagnostic Centre ki nongpang ki lah ban ïoh ïaki jait eskamin kum ka MRI, ka CT Scan, ka Ultra Sound, ka X Ray ryngkat bad ki test snam kiba pher bapher khlem da hap siew pisa”.
Ka Sorkar Kmie haka ka jingïalam jong u Narendra Modi kum u Prime Minister ka la pynmih ïa ka skim Ayushman kaba ai T. 5 lak tyngka ka health insurance ïa manla u wei pa uwei u nongshong shnong ka Ri India, la ong u Bah Hek.
U Bah Hek haba pan ka jingkyrshan u paidbah na ka bynta u Bah Sanbor ula kyrpad ïa u paidbah ban ai ka vote ka jong ki sha u Bah Sanbor namar ma u ruh u dei u hi u Pnar. U Bah Sanbor u la long MLA jong ka Shillong South la lai samoi mynta bad u la ju long ruh u MDC ka Laban Mawprem Constituency la san sien kynthih bad u long u briew uba la ih bad tbit bha ha ka lain saiñ hima sima. U la kyntu ia ki paidbah ba ki dei ban jied ia u Bah Sanbor kum u MP namar u don ha ka party kaban sa synshar ïa ka Ri India namar u thikna ba ka BJP kan jop kput biang ha kane ka eleshon MP.
U Secretary Shnong barim jong ka Shnong Khanduli U Bah Iaraplang Dkhar haba kren ula pynpaw ïaka jingeh ka thaiñ khappud khamtam haki jaka sumar bad ka sorkar kumjuh ki MP haduh mynta kim shym la phai khmat sha katei ka thaiñ ban wanrah ki kam pynroi.