Press "Enter" to skip to content

Hapoh 48 kynta pan jubab ka EC na u Myntri ka Sorkar MDA ba pynkheiñ MCC

Shillong, Ïaïong 05: Ka Election Commission hynne ka sngi thohdieng, kala pan jubab hapoh 48 kynta na u Myntri Sorkar bad MLA ka BJP Bah A.L.Hek halor ka jingkynnoh ba u pynkheiñ ïa ka Model Code of Conduct da kaba pyndonkam ïa ka kali Sorkar ban ïalap elekshon ha West Jaiñtia Hills District dang shen.
“U District Election Officer ula phah ïa ka showcause Notice sha u Myntri ka Koit ka Khiah halor ka kaiphod jingtohkit bala ïoh pdiang na u Sector Officer bad ki Pulit” ong u Bah Fredrick Roy Kharkongor, Chief Electoral Officer (CEO) ka Jylla.
Kat kum ka jingong u CEO, une u Myntri Sorkar u iohpor 48 kynta ban phah ïa ka jubab halor kane ka jingkynnoh. Ka Election Commission kala hukum ban tohkit halor ka jingujor bala ïohpdiang, kaba kynnoh ba une u Myntri ula pyndonkam ïa ka kali sorkar ML)1-7641 ban ïalap elekshon ïa u kyrtong ka BJP Bah Sanbor Shullai ha ka shnong Khanduli, kaba don ha khappud bad ka Jylla Assam.
Shuwa kane, u Deputy Commissioner CP Gotmare ula ong ba ïa ka rai ban pynsajia ïa une u Myntri kan sa long hadien ba dep ban pule ïa ka kaiphod bala aiti da u Sector Officer bad ki Pulit.
Ha kajuh ka por, u CEO ula pyntip ba ki Ophisar pyniaid elekshon kila ïoh ban kurup haduh T. 50 lak ka pisa na ki jaka bapher bapher jong ka Jylla ka ban sa leit sha ka elekshon MP ha ka 11 tarik Ïaïong.
Ka jingioh kurup pisa kaba heh duh ka la jia ha South West Khasi Hills District bad ha Ri-Bhoi District ha kaba ki bor pynïaid elekshon kila ïoh ban kurup haduh T.20 lak bad T. 19 lak.