Press "Enter" to skip to content

Lada phim leit thep Vote, phi la pyndem ïa ka hok jong phi: CEO

Shillong, Ïaiong 06: Ka tnat Election jong ka Sorkar Jylla ka la trei shitom ban pynlong rynsan bapher bapher ban khring ïa ki samla lud ba dang khie dang san kiba la kynjoh sha ka rta kaba 18 snem ban pynrung kyrteng ïa lade ha ka Electoral Roll bad kumjuh ban pynlong ruh ïa ki jingpynshai paidbah kiba ïadei bad ka elekshon.
U Chief Electoral Officer (CEO) u Bah Bah Frederick Roy Kharkongngor haba kren shwa ban khaweh lama ha ka jingpynmareh saikil kaba la long mynta ka sngi saitjaiñ ha nongbah Shillong u la ong, “kane ka long kum ka jingkyntu ïa ki paidbah ba kin ïamih ha ka sngi thep Vote ban jied ïa u Nongmih khmat da kaba ïa shim bynta ha ka sngi thep vote.”
U la ong, “ki don ki briew kiba leit ban thep vote bad kane ka jingleh kam dei ka jingïaleh pyrshah jong ki, hynrei ka jingbym leit ban thep vote ka pyni ba phi la pyndem ïa ka hok ka jong phi da kaba khlem thep ïa ka vote.”
U la kyntu ba dei ban ïamih paidbah ban pyndonkam ïa kane ka hok ba ka Riti Synshar jong ka Ri India ka la pynkupbor ha manla uwei pa uwei u nongshong shnong ka ri India.
Ban pynshlur ïa ki paidbah ba ki dei ban pyndonkam ïa ka hok ki dei ban ïashim bynta ban leit thep ïa ka Vote
Ha kane ka sngi u CEO u la kaweh ïa ka lama na ka bynta ki lai tylli jingïakop niah saikil, ka jingïakop niah thuk thuk “Royal Enfield” bad ka jingpyninam ïa ki kali Jeep kiba la rim tam ha kane ka nongbah Shillong kiba la shna naduh u snem 1947.
La sakhi lang ha kane ka sngi, da ki heh ophisar ka Sorkar Jylla, ba kynthup ïa u District Election Officer, ka Superintendent of Police ka East Khasi Hills, u Superintendent of Police (City) ka nongbah Shillong bad kiwei kiwei.