Press "Enter" to skip to content

Sam kot lyngkdop ka KSU ha ka jingrakhe ïa ka Sngi Kyrsiew Ri ha Ri-bhoi

Nongpoh, Ïaïong, 06: Kum shi bynta ban rakhe burom ïa kata ka sngi kyrsiew thiah ïa ka jaid bynriew (National Awakening Day) ha ka jylla ban kynmaw burom ïa ka sngi kaba U Tirot Sing Syiem u la ïakhun dohïap ïa ki mynder Dohlieh kiba synshar bad thombor ïa ka bri u Hynniewtrep kaba la dap 190 snem mynshuwa, ka Khasi Student Union, North Khasi Hills District ha ka 4 Tarik mynta u B’nai ka la sam da ki kot lyngkdop sha ki paidbah ka dong Ri Bhoi.
Haba ïa kren bad u Nongthoh khubor u Mawphor, u President ka KSU, North Khasi Hills District u la ong ba ka seng ka sngewkmen ban ïoh rakhe ïa kane ka sngi kyrpang ban kyrsiew thiah ïa ka jaid bynriew bad ruh ban kynmaw burom ïa ki kam bah kiba u Syiem Tirot Sing Syiem u la ïa khun ban pynïoh ïa ka jinglaitluid ha poh ka jylla na ka jingsynshar donbor ki phareng.
U la ong ruh kum ka jingburom ïa kane ka sngi kyrpang ka seng ka la shim ka sienjam ban sam ïa ki kot lyngkdop sha ki paidbah kaba long ka jinganngud ba kin ïoh lum jingtip halor ki kam bah kiba u Syiem Tirot Singh u la ïakhun pyrshah ïa ki dohlieh ban ïoh ïa ka jingsynshar Laitluid hapoh ka jylla bad ka ri.
“Ka seng KSU ka dei kawei na ka seng kaba ieng skhem ha ka nongrim ban pynim ïa ka jaid bynriew bad dei namar kane ka daw ba ka seng ka sam ïa kane ka kot lynkdop kaba long shi bynta ban pynkyndit thiah ïa ki khun ka jaid bynriew Khasi ba ki dei ban don kata ka jingkitkhlieh ban ïada ïa la ka jong ka jaid bynriew” u la ong.
Ka seng ka kyntu ruh ïa ki paradoh ki parasnam ba kim dei ban klet ïa ka tynrai ka jaid bynriew, hynrei ki dei ban long kum u Syiem Tirot Sing Syiem uba kloi ban aiti ïa ka jaid bynriew da kaba kham bha ban ïap ha ïingbyndi ban ïa kaba long syiem kum u syiem mraw.
Namarkata, u la ong ruh ba ka seng ka khot ka wer ruh ïa ki paradoh ki parasnam ba kim dei ban klet ïa la ka jaid bynriew, namar dei tang ka jingïatylli bad ka jinglen lade ngin lah ban ïada ïa la ka jong ka jaid bynriew khamtam mynta ka jingma ka ap na ka jinglehdon bor ki Dohiong kumba la leh da ki dohlieh.