Press "Enter" to skip to content

Byrngem mudui ejahar ka NEHUSU pyrshah u Pro VC

Shillong, Ïaïong, 10: Ka North Eastern Hill University Students Union (NEHUSU), Shillong ka la byrngem ban mudui ejahar pyrshah ïa u Pro Vice Chancellor jong ka NEHU, Tura bad ïa u Proctor jong ka NEHU Tura halor ka jingjia kaba la mih ha ka sngi saitjaiñ ha kane ka skulbah kaba don ha Tura, West Garo Hills District.
Ki la mih ar tylli ki jingïakynnoh ba mar kylliang halor ka jingkynnoh ba ki nongïalam ka NEHUSU ki la kawang maw ïa ka ïingsah jong u Pro Vice Chancellor ka NEHU Tura Campus ha kaba na ka liang ki bor pynïaid ka NEHU-Tura ki la ïai ban beit ïa kijuh ki jingkynnoh, katba na ka liang ka NEHUSU-Shillong ka la kyntait mardor ïa kine ki jingshah kynnoh.
Katkum ka shithi ba la phah da u Pro Vice Chancellor jong ka NEHU Tura Campus, u G Singhaiah, ki nonghikai bad ki nongtrei jong ka NEHU ki la pynrem jur halor kane ka jingjia hapoh ka Campus. U la ïathuh ba ki bor pynïaid ka NEHU ki la mudui ruh da ka ejahar sha ki pulit halor kane ka jingjia.
La kynnoh ruh ba ka kynhun ki nongkitkam ka North-Eastern Hill University Students Union (NEHUSU), Shillong kiba la leit sha NEHU, Tura ki la thaw jingkulmar bad ki la kawang dusmon da ki maw ïa ki jingkhangiit jong ka ïingsah jong u Pro Vice Chancellor (PVC) jong kane ka skulbah, u G Singhaiah kaba don ha Tura, West Garo Hills dang shen bad la kynnoh ruh ba ki la ktah kti ïa ki 7 ngut ki nongbylla sngi kiba trei hapoh kane ka Campus.
Katba na ka liang ka NEHU Students’ Union-Shillong ka la shim ba kane ka jingshah kynnoh ka long ka bym lah satia ban pdiang da leilei ruh em
Na ka liang ka NEHUSU ka la byrngem ban mudui da ka ejahar pyrshah ïa u Proctor of NEHU Tura halor ka jingkynnoh runar ïa ki bad pyrshah ïa u Pro VC jong ka NEHU Tura da kaba kynnoh ba u ibeiñ ïa ki.
Ki la kynnoh ruh ba ha kaba ïadei bad ka jingkawang maw, ka NEHUSU ka la shah pynbor ban phla ha kajuh ka sngi ba la mih kane ka jingjia ha ka 7 tarik mynta u bnai ha ka por 6:00 baje janmmiet, namarba ki bor pynïaid jong ka NEHU-Tura ki la mih paidbah bad byrngem ruh ïa ki nongïalam ka NEHUSU.
Ha kaba ïadei bad ka jingkynnoh ba ki 7 ngut ki nongbylla ki shah ktah kti, ki nongïalam ka NEHUSU ki la pynshai ba kim shym la ktah kti satia ïano ïano ruh kumba la kynnoh. Ka Seng ka la kam ba ka jingpynphai nia bad ki nongbylla ka dei tang namarba kine ki nongbylla ki la kren kynshleiñ ïa ka President ka Seng.
“Ngi la ïania bad ki nongbylla bad bthah ruh ba kin long kiba don akor bad lada ngi la ktah kti shisha ïa ki nongbylla ngi dawa ba ki dei ban sei da ka Medical Examination Report ka ban pynksan ïa ka jingkam jong ki,” ong ka NEHUSU.
Shuh shuh ki la kynnoh ruh ba u PRO VC ka NEHU Tura u la kren beiñ ïa ki nongïalam ka Union. “U la kyntait wat ban ïa khublei kti bad ong, ‘Ngam ju kwah ban ïa khublei kti bad ki briew kiba kum ma phi,” bad hadien kata u la kynteit biang da kaba ong, “nga tip bha ïa ki briew kiba kum ma phi,’ bad ïaid noh, la kynnoh ka NEHUSU.
Ka NEHUSU ka sngew ba kane ka jingkynnoh ka dei tang ka jingpyrshang ban pynkbum ïa ka sur jong ka Union, kaba ïakhun na ka por sha ka por ïa ka hok jong ki samla pule.