Press "Enter" to skip to content

Da ki ar-shaka pynkhreh ka Rapido ban kamai ha Shillong

Shillong, Ïaiong 10 : Ka Shillong kan dei ka nongbah kaba ar ha ka thaiñ shatei lam-mihngi jong ka Ri ban pynkamai noh da ki kali ar-shaka ban pynsuk ïa ka leit ka wan jong ki paidbah ka nongbah khamtam ha kum kane ka por ba jur ka dheng kali.
Ïa katei ka sienjam ban pynkamai da ki ar-shaka la maitphang da ka Rapido Bike, ka kompeni na Bangalore, kaba don ïa ka thong ban plie lad ïa ki samla bym pat donkam don jam ban phaikhmat noh da katei ka lad kamai ban leit buh leit shaw ïa ki nongleit jingleit ha kylleng ki bynta jong ka nongbah.
Katkum ka kyrwoh na ka Rapido Bike, la ong ba mynta ka jingpynkhreh bad pynrung kyrteng ïa ki samla ba don ïa ki kali ar-shaka ka dang ïaid shakhmat bad la ong ruh ba tang shu dap 100 ngut kiba kwah ban sdang da katei ka sienjam ba thymmai, shen sdang noh ïa ka kamai ha ka nongbah.
Na ka liang u Jeetesh, Regional Manager ka Rapido u la ong ba hadien ka Guwahati, ki phai khmat mynta ban sdang noh ha Shillong, bad kan long ruh ka jaka kaba ar ha ka thaiñ shatei lam-mihngi jong ka Ri. La khmih lynti ruh ba ha Shillong kin don bun bha kiban jied da ki ar shaka ban leit ban wan kylleng kylleng khamtam ha kito ki por ba jur bha ka dheng kali. “Kane kan long ruh kum ka lad aikam aijam ïa ki samla shynrang bad kynthei ka nongbah kiba jied ïa katei ka kam,” ong utei u heh ka Rapido.
Katkum ka jingong jong u, ban don ha ka kynhun ki nongñiah ar shaka ba la ai kyrteng ‘Captains’, ki paidbah kiba kwah ki hap ban ai kyrteng ïalade bad shwa kane ki hap ban pyntikna pat ba ki don ki kali ar-shaka, ka mobile android bad ruh ka laisen kaba biang. Nalorkata, la ong ruh ba kum ki captain ki lah ban kamai ym duna ïa ka 25,000 tyngka shibnai kumba long lem ha kiwei ki nongbah jong ka Ri.