Press "Enter" to skip to content

Dawa ka HFU ia ka Sorkra ban pyntreikam ïa ka Crop Insurance Scheme

Mawkyrwat, Ïaïong 10: Ka Hills Farmer Union (HFU) ha ka jingïalam jong u President Central Body u bah Commander Shangpliang ka la ban jur ïa ka sorkar ba kan pynkloi ban phah ïa ki jingai jingïarap sha kito ki nongrep kiba la shah ktah ha ka jinglynshop jong ka bor mariang ïa ki jingthung jingtep jong ki ha kylleng ka Ri Khasi.
Ha ka juh ka por na ka liang ka HFU ka kwah ba ka sorkar kan pyllait noh ïa ki jingïarap sha kito kiba la shah ktah ha ki snem kiba la dep ryngkat bad ka jingai jingïarap kiba la shah pynjulor mynta u snem. Ka jingïarap kam dei ban long kum ka jingibeiñ (insult) ïa ki nongrep haba ai jingïarap. Kaba mut haba ai jingïarap ym dei ban ai jingïarap tang 100 ne 200 tyngka dei ban ai katkum ka jingjulor jong ki mar rep. Ka dawa ruh ba ka sorkar ka dei ban pyntreikam noh ïa ka Crop Insurance Scheme khnang ba ki nongrep kin ïoh jingmyntoi haba don kiba kum kine ki jingjia kiba ka bor mariang ka lynshop ïa ki jingthung ki nongrep jong ngi.
Shuh shuh ka seng ka kwah ba ka sorkar kan wanrah noh ïa ka Farmer Commission kumba la dawa ha ka jingïalang jong ka Farmer Parliament dang shen nalor kiwei kiwei ki jingdawa ba la buh hakhmat ka sorkar.
“Man ka snem ka ju don ka jingpynjulor jong ka bor mariang ïa ki jingthung jingtep jong ki nongrep khamtam ha kum kane ka por slap bad mynta u snem ruh ngi la sakhi ïa kiba bun ki shnong kiba la shah ktah ha ka jinglynshop jong u phria ha kylleng ka ri Khasi”, ong u bah Shangpliang da kaba bynrap ruh ba lada ka sorkar ka sngewkhia shisha ïa ka rep ka riang kam dei ban shu kren tang da ktien hynrei ka dei ban pyni noh da ki kam ym dei ban shu kren ba ki sngewkhia bad kwah ban kyntiew ïa ka rep ka riang namar tang ka ktien kan nym myntoi lada ym leh da ki kam.
“Nga kyntu ïa ki nongrep ba ngi dei ban ïeng tylli kawei ryngkat bad ka seng khnang ba ngin lah ban pynurlong ïa kiba bun ki jingdawa ki ban wanrah ka jingmyntoi ïa ki nongrep ha ka jylla hi baroh kawei”.