Press "Enter" to skip to content

Dawa ki ritpaid ban pyntreikam hok ïa ka bhah thungkam ba 10 %

Shillong, Ïaiong 10: Ki artylli ki seng jong ki jaidbynriew rit paidbah kiba sah ha ki jaka them ka Ri-lum Garo, kila dawa ïa ka Sorkar Jylla ba kan pyntrei kam hok noh ïa ka bhah thungkam ba 10% jong ka General Category, ka bym shym la treikam haduh mynta.
Kane ka jingdawa kala mih na ka seng Kissan Society bad ka All Meghalaya Minority Students’ Union (AMMSU),kiba la aiti ruh da ka dorkhas hynne ka sngi sha u Myntri Rangbah ka Jylla Conrad Kongkal Sangma lyngba u para u Myntri kam pohïing James K Sangma.
Haba kdew ïa ka jingduna ka jingthungkam ïa ki briew na ki rit paid, kine ki artylli ki seng ki ong ba wat ka bhah ba 10% jong ka General Category kam shym la treikam satia haduh mynta.
“Kila don bun ngut ki samla bala nang la stad ha ka thaiñ bad ka jingdon jong ki kala nang kiew na ka snem sha ka shem. Kito kiba ïoh kam ruh ki ju mad ïa ka jingshah leh bym suidñiew” ong u Nur Islam, President ka AMMSU haba bynrao ‘Watla ngi la dei ki Nongshongshnong ka Jylla naduh ba ïoh ïala ka jong ka Jylla hynrei ki jaidbynriew rit paid kim pat ju don ïa ki Ophisar ba bat kyrdan (MCS,DO, BDO bad kiwei). Ngi la shah iehbeiñ shaba palat bad mynta ngi kwah baka Sorkar kan plie lad bha ïa ki rit paid ha ka ïohkam ïohjam nangne shakhmat”.
Halor ka jingpynbiang ïa ki lad ai jingsumar, kine ki seng ki sngew ba kila shah iehbeiñ bha ha ka Sorkar haba phaikhmat sha kiwei pat ki jaka kiba la nang kiew shakhmat katba nang ïaid ki sngi.
“Ka Sorkar kala tei ïa ka CHC bad PHC hynrei baroh ar kim shym la treikam satia. Haba ngi pang ngi shitom, ngi lah ban leit shaduh Goalpara, Assam ban ïoh ïa ki jingsumar. Ngi dawa ba dei ban plie noh ïa kine ki jaka ai jingsumar” ong u Abdul Azad, Secretary ka Kissan Society.
Kine ki artylli ki Seng kila kdew ruh ba ki don shibun ki kam kiba lait thylli ha ki tnad bapher bapher kiba dei ban thung pyndap noh. Ki ong “Ngi la ïoh jingtip ba ha ka Tnad Sericulture ki don haduh 82 tylli ki kam ba lait bad ki don ki briew bala dep hikai jong ngi kiba biang ban thungkam”.
Kine ki artylli ki seng kila dawa ruh ïa ka Sorkar Jylla ba kan pynkha noh ïa ka Sub Division kaba hap hapoh ka Bhaitbari (Raipur). Ki ong “Ïa ka jingieid Jylla jong ngi la shah buh jingkylli mynta bad ngi la shah kheiñ ruh kum ki nong Bangladesh bad la khang ruh ïa ngi ba ym dei ban thep vote ha ka elekshon District Council. Ha ka por ba pynkha ïa ka Jylla, ngi la jied ban ïasoh bad ka Meghalaya bad ka jingthaw ïa ka Sub Division kan iarap shibun ïa ngi ba ngin ïoh ïa ki jingmyntoi ba ngin lah ban synniang lem sha ka Jylla”.
Kine ki Seng kila dawa ruh ban wanrah ïa ka BSc College/ University ba thymmai hapoh ka thaiñ khnang ba ki paid nongshong shnong ha ki jaka them ka Jylla kin ïoh ïa ka lad ban pule ha kane ka kyrdan.