Press "Enter" to skip to content

Kylla ka trok ha Nongspung

Nongstoiñ, Ïaiong 10 : Kawei ka trok kaba kit ïa ki pos lait kaba don ïa u number U.P 75 M 8373, kaba thmu ban leit buh sha thaiñ Riangdo sharum, ka la kylla noh hynne ha kawei ka jaka ba ju jia bha ki jingaksiden, shwa ban poi ha ka shnong Nongspung West Khasi Hills. Kane ka jingjia ka la jia ha ka por kumba 2:30 ei ei janmiet.
Ha kane jingjia u nongbud jong katei ka trok u Anil Kumar 29 snem karta, u la mynsaw jur bha. Katkum ka jingïathuh jong ka tnad Traffic Police jong ka Nongstoiñ, la ong ba utei u ba la mynsaw jur la pynkit mardor sha Nongstoiñ Civil Hospital. Hynrei namar ba u la mynsaw jur la pynkit noh mardor sha NEIGRHIMS Shillong.
Nalor utei u ba mynsaw, la ïathuh ba u nongñiah jong katei ka trok u Omar Singh Yadav 26 snem karta ruh u la mynsaw tangba um da jur bad baroh ar ngut kine kiba la ngat ïa kane ka apot ba sngewsih, ki dei na ka Jylla Uttar Pradesh.
Kumban shu pynkynmaw ba katei ka jaka ba long khongdong bha shwa ban poi ha shnong Nongspung, ka la wanrah ïa ki jingjia aksiden ba shyrkhei bha la bunsien. Kaba shyrkhei tam ka dei kaba jia ha u snem 2017 ha kaba kawei ka trok kaba la pynher sted da u nongñiah ban leit jingïaseng Synod Samla ha Nonglang, ka la tynrah ïa ka jingker bad ha kane ka jingjia 12 ngut ki mynsiem ba kordor ki la khlad hashen. Kham hadien ka jingkhlad jong ki briew ka la poi sha ka 20 ngut bad kiba mynsaw pat ki long palat 50 ngut.