Press "Enter" to skip to content

Maham ka NTC bad ka Shnong ban leit bret jaboh kulmar ha Umshangling

Nongpoh, Ïaïong : Namar ba bun ki riew shimet kiba shim kabu ban leit bret pathar ïa ki jaboh sha ka jaka theh ñiut ha Umshangling kaba la buh jingeh ïa ki paidbah nongshong shnong ka Shnong Umshangling, na ka liang ka Nongpoh Town Committee bad ka Dorbar Shnong Umshangling ka la pynmih syndon da ka hukum kaba tyngeh ban khang pyrshah ïa ki paidbah ban leit bret ñiut khlem da ïoh jingbit ha ka jaka theh ñiut ha Umshangling.
Kum ban pynkynmaw, ka jaka theh ñiut ha Umshangling ka dei ka jaka kaba la ailad ban theh ïa ki jaboh kiba mih na ka sor Nongpoh da ka jingtip lang ka Nongpoh Town Committee bad ka Dorbar Shnong Umshangling, hynrei ha kine ki sngi la don ki riew shim kabu kiba la leit theh ñiut kulmar khlem ka jingtip ka Nongpoh Town Committee bad ka Dorbar Shnong Umshangling.
Haba ïa kren bad ki Nongthoh khubor, u Secretary ka Nongpoh Town Committee, u Bah Rahonald Kharkamni u la ong ba ka Nongpoh Town Committee ryngkat ka Dorbar Shnong Umshangling ki pynpaw ïa ka jingsngewkhia kaba jur, ha kaba ka jingleit theh kulmar ïa ki jaboh ha katei ka jaka ka la wan rah jingeh ïa ki paidbah bad ka buh ruh ka jingma kaba khraw na ka bynta ka koit ka khiah ki paidba nongshong shnong.
“Kumba la ujor da ka Dorbar Shnong Umshang-ling, ki don ki riew shim kabu kiba la leit ban theh ñiut ha katei ka jaka bad ki la shim kabu ruh da kaba theh ïa ki jaboh wat ha ki surok Shnong” ong u Bah Kharkamni babd bynrap ruh kane ka jingshim kabu ki riew shimet la khang pryshah da ka Dorbar Shnong bad ruh ka Town Committee ba na ka bynta ka khuid ka suba bad ka koit ka khiah ki paidbah nongshong shnong kan nym dei ban don kano kano ka jingpynhap jaboh kulmar ha ki jaka Shnong” u la bynrap.
U la ong ruh ba ka Dorbar Shnong Umshangling bad ruh ka Nongpoh Town Committee kin don ka jingïatrei lang bad ban peitngor ïa kino kino kiba wan bret jaboh sha katei ka jaka khlem ka jingtip lang ka Town Committee bad ka Dorbar Shnong bad lada lap nangne shakhmat kin shim da ka lad kaba tyngeh ban pynshitom ïa kum kitei ki riew shim kabu kiba wan bret jaboh kulmar kaba la long ka jingma na ka bynta ka koit ka khiah bad ka khuid ka suba ha ka Shnong Umshanglien.
Kum ban pynpaw, ka tnad Urban Affairs ka ladep ban tei ïa ka Solid Waste Management ha Umshangling kaba la mang tyngka da ki klur da ka jingthmu ban wan rah ïa ka khuid ka suba bad ban ïada ïa ka mariang bad shen kane ka Solid Waste Management yn plie paidbah noh n aka bynta ka khuid ka suba ha ka sor Nongpoh bad ruh ha katei ka Shnong ba don katei ka jaka theh ñiut ba la tip kum ka Solid Waste Management.