Press "Enter" to skip to content

Mudui PIL ka SEPSD bym pyntreikam ïa ka pisa pynbha mariang 433 Klur

Jowai, Iaiong, 10: Ka Society for Environmental Protection and Sustainable Develop-ment (SEPSD) ka la ujor da ka mukotduma Public Interest Litigation (PIL) ha Meghalaya High Court pyrshah ïa ka Sorkar Jylla, ki tnad ba dei peit ïa ka mar poh khyndew ba kiwei halor ka jingbym pyndonkam ne pyntreikam ïa ka Meghalaya Environment Protection & Restoration Fund (MEPRF) kaba la kot T.433 Klur kaba long ka pisa kaba oh na ka khajna dewiong ban pynbha pynmiat ïa ka mariang kaba la shah pynjulor na ka daw jong ka tih dewiong ha ka jylla.
U Nongïalam ka SEPSD u Wanbun Dkhar uba na Khliehtyrshi, West Jaiñtia Hills haka 9 tarik Iaiong ula ujor da Mukotduma pyrshah ïaka sorkar jylla namar ba wat hadien bala ïoh lum kane ka pisa T.433 klur, hynrei haduh mynta ym pat ïohi kino kino ki dak ki shin ba ka sorkar kan pyndonkam ïa kane ka pisa ban pynbha biang ïa ki jaka ba shah pynjulor ka mariang na ka jingtih dewiong.
Ka jylla Meghalaya ka la ïoh lum kane ka pisa T.433 klur na ka Meghalaya Environment Protection & Restoration Fund (MEPRF), kaba la lum katkum ka jingbthah jong ka National Green Tribunal na u dewiong ba ladep tih bad thew ha ki par dewiong naduh u snem 2014.
Ka National Green Tribunal Principal Bench ka la khang ïa ka jingtih dewiong ha ka jylla Meghalaya naduh u bnai Jymmang 2014 hadien ka jingshah ujor ha ka All Dimasa Students Union Dima Hasao District Committee pyrshah ïa ka Jylla Meghalaya nalor kiwei kiwei halor ka nongrim ba ka jingtih dewiong ka pynjakhlia ïa ka umbam umdih bad jaka rep sha ki bynta ba sharum ka Wah Kupli.
Naduh ba ka NGT ka la pynmih ka hukum ban oh khajna MEPRF ka jylla ka la ïohlum ïa kane ka khajna palat T.400klur.
Lah ban pynkynmaw hangne ba ka jingthmu jong ka Tribunal ban bhah ïa ka Meghalaya Environment Protection & Restoration Fund ka long ban pynbha pynmiat ïa ki mei mariang kaba la shah pynjulor na ka daw jong ka tih dewiong ha ka jylla.
Une u samla ruh u la ujor ïa kane ka mukotduma ba u angnud ba ka Sorkar kan pyntreikam hok ïa kane ka pisa ban pynbha biang ïa ka mariang kaba la shah pynjulor.