Press "Enter" to skip to content

Rai boycott ka shnong Mawlum Nginïong ïa ka elekshon Lok Sabha

Ba jah kyrteng na ka Electoral roll

Nongstoiñ, Ïaiong 10: Ka Dorbar Shnong Mawlum Nginiong, West Khasi Hills, ka la rai ban boycott (ban ym leit thep vote) ïa ka elekshon MP-Lok Sabha jong ka Shillong Parliamentary Constituency namar ka jingjah kyrteng jong ka Shnong napoh ka Electoral Roll jong ka Election Commission of India (ECI).
Ka shnong Mawlum Nginiong, kaba hap hapoh ka Rambrai-Jyrngam Assembly Constituency, ka la shim ïa kane ka rai ha ka Dorbar ba long myn ha ka 9 tarik mynta u bnai haba kyrpad ruh ïa ki bor pynïaid election ba ki dei ban peit bad ban pynbeit mardor ïa kane ka kam.
Katkum ka kyrwoh na u Secretary Shnong Bah N.K.Nongbri, u la ong ba ki nongshongshnong jong ka Mawlum Nginiong ki dap da ka jingkyndit bad jingshaiong namar ka jingjah kyrteng kynsan kynsan jong ka shnong na ka Electoral Roll. U iathuh ba ki Nongthep Vote jong ka Shnong ki ju leit thep vote hapoh ka Polling Station Nginiong wat ha ka elekshon MDC ba dang shu dep long.
Une u Nongialam Shnong u ong, kumba ka paw mynta ki paid nongthep vote jong ka Shnong ki la duh ïa ka hok ban thep vote namar ka Shnong bad ki Nongthep Vote ba sah ha ka, kim don shuh ha ka Electoral Roll.
Katkum ka jingïathuh jong une u Rangbah, ka Shnong Mawlum Nginiong ka la ioh ia la ka jong ka shnong naduh u snem 1998 da kaba phiah ïa ka shnong Nginiong. U ong ka Shnong ka la kynjoh mynta la 20 snem tam bad ka la don ar tylli ki skul, ka don la ka jong ka thup kyrteng ki BPL, ka la ioh ia la ka jong ka skhim PHE nalor ka jingdon la ka jong ka Balang Presbyterian.
“Ka Shnong ka la rung kyrteng ha u snem 2016 hapoh ka Electoral Roll jong ka Jylla hynrei kyndit kynsan mynta ka kynti kane ka kyrteng ka la shu jah kynsan kynsan na ka Electoral Roll” ong u Bah Nongbri haba bynrap “ka la don ka jingialam bakla mano re mano ïa ka Ophis ba dei peit.”
Une u nongialam shnong u la pyntip ba ka Shnong ka la shong dorbar kyrkieh halor kane ka kam ha ka 9 tarik mynta u bnai bad ka la shim da kawei ka rai ban ym leit shuh sha ka jaka thep vote.