Press "Enter" to skip to content

Sha u President ka Ri ujor ki heh Sorkar pyrshah ïa ka ECI

New Delhi, Ïaiong 10 : Haduh 66 ngut ki heh ophisar barim ki la ujor sha u President ka Ri u Ram Nath Kovind ban pynpaw ïa ka jingsngewkhia halor ka rukom treikam jong ka Election Commission ban peit ïa ki kam kiba ïadei bad ki jingjia kynnoh pynkheiñ kyndon elekshon khamtam eh kito kiba tyngkhuh bad ka party ba bat ïa ka bor synshar.
Katto katne na ki jingujor, ki kynthup halor ka jingkren jong u Myntri Rangbahduh ka Ri, u Narendra Modi sha ka Ri halor ka ‘anti – satellite weapon (ASAT), nangta ka khana shaphang ka jingim jong u, ka NaMo TV bad ruh halor ka jingkren kynthah jong u Myntri Rangbahduh nalor kiwei kiwei ki heh ka BJP.
Kitei ki ophisar ba kynthup naduh u heh IPS barim, u Julio Ribeiro, Foreign Secretary barim, u Shiv Shankar Menon bad u Lt Governor barim ka Delhi, u Najeeb Jung ha ka jingthoh ki la ong, “Ka rukom treikam jong ka Election Commission jong ka India ha ka lynti kaba laitluid, kaba khuid bad ka bym shah liang, kam long shuh kumta mynta, bad kane ka buh jingma ïa ka rukom jied nongmih khmat ha ka ri synshar laitluid ha India. Ngi sngewsih ban ïohi halor ka jingpyndonkam bakla bad jingbym patiaw ïa ka Model Code of Conduct da ka party ba don ha ka liang synshar ha ka Ri bad ka jingbym leh ei ei jong ka ECI ïa kitei kiba pynkheiñ kyndon.”
Kiwei kiwei pat kiba soi lang ha katei ka jingujor, ki kynthup ïa u Chairman bari ka TRAI u Rahul Khullar, u Health Secretary barim u Keshav Desiraju bad u CEO barim ka Prasar Bharati, u Jawhar Sircar bad ruh u heh IPS barim u Meeran Borwankar.
Katei ka kynhun ki heh sorkar ka la dep ban thoh teng ruh sha ka Election Commission jong ka Ri ban kyntu ïa ka ba kadei ban khang ne pynsangeh shwa ban pyllait ïa ki khana shaphang ka jingim (biopic) jong kino kino ki nongmihkhmat paidbah bad pynpaw ruh ïa ka jingbynñiaw ba la shah ban pyllait ïa ka biopic jong u Myntri Rangbahduh.