Press "Enter" to skip to content

Ba bakla pyndait EVM, na ka EC pan thep vote biang shi jaka ha Selsella

Shillong, Ïaiong 12 : Ka jingbakla pyndait ïa ki kor thep vote ha kawei na ki jaka thep vote ha Selsella constituency, ba la tip kum ka Konarchar Poling station ka la pynlong ïa ki bor pynïaid elekshon ha Meghalaya ban kyrpad ïa ka Election Commission ka Ri ban pynlong biang da kawei ka jingthep vote ha katei ka polling station.
Haba kren bad ki lad pathai khubor, u Chief Electoral Officer, Bah FR Kharkongor u la ong, “Ngi la pynpaw ba dei ban pynlong biang ïa ka jingthep vote ha Konarchar polling station kaba don 712 ngut ki nongthep vote hapoh ka Selsella assembly constituency ha rilum Garo, hadien ba ki Sector Officer ki la
lap ba ka don ka jingbakla briew ban pyndait ïa ki kor EVM kiba dei na ka bynta ka elekshon MLA shiteng samoi bad ruh na ka bynta ka elekshon MP.”
Katkum ka jingong jong u, ki nongthep vote jong ka Selsella constituency ki ïoh ban thep vote ar sien ha kajuh ka sngi, kata kawei na ka bynta ka elekshon MLA shiteng samoi (na ka daw ka jingkhlad noh u MLA jong ka u Clement Marak) bad kawei pat na ka bynta ka elekshon MP. U la ong ruh ba ha ka jingbakla briew, u presiding officer u la kum bakla pyndait ïa kitei ki kor thep vote.
U la ong ruh ba ïa katei ka jingbakla la lap da u Sector Officer hadien ba ka jingdon ki vote bad ki nongthep vote kam ïahap satia. Nalorkata, u la ong ruh ba mardor hi ki la phah ïa ka jingtip sha ka Election Commission ryngkat ki jingkyntu ba dei ban pynlong biang sa shisien ïa ka jingthep vote ha katei ka polling station.
“Ïa mynta ngi dang ap ïa ka tarik ban pynlong biang ïa ka jingthep vote bad ngi khmih lynti ban pynlong noh shen,” la bynrap biang u CEO.
Ha kajuh ka por, la ïathuh ruh ba ki la ïoh pdiang ïa ki jingtip ba ka don ka jingthut jong ki tiar ha ki 6 tylli ki jaka thep vote, kata 2 tylli ha u pud jong ka Shillong seat bad saw jaka pat ha Tura Parliamentary seat.
“Kitei ki jingbakla kidei na ka jingklet jong ki polling offiser ban pynkhuid ïa kito ki vote ba ki pyrshang (mock poll),” u la ong da kaba bynrap ba kitei ki jaka ki kynthup ïa ka Khliehrangnah Polling Station kaba ha Raliang constituency, West Jaiñtia Hills bad ka Nongpyndeng PS kaba ha Nongstoiñ constituency kiba hap ha ka Shillong parliamentary seat.
Katba ha Tura seat pat ki kynthup ïa ki lai tylli ki polling station ba hap ha Gambegre constituency, kata ka Possenggagre PS, ka Aminda Simsang PS bad ka Tochapara PS katba sa kawei pat kadei ka Dawa Gittingre PS kaba hap ha Williamnagar constituency.
Halor kitei ki jingbakla, u CEO u la ong ba na ka liang ki Returning Officer ki la ai jingmut ba dei ban ñiew lang ïa ki slip jong ki mashin VVPAT ha ka por ba ñiew ïa ki vote khnang ba ka jingwan ki nongthep vote kan ïahap bad ka jingdon ki slip.