Press "Enter" to skip to content

Ba nang hiar dor ka burom ka akor, da ki kot pynmih u Fr. Barnes Mawrie

Shillong, Ïaiong 12 : Ka jingnang hiar dor ka burom ka akor la ka long ha ka jingim shimet ne ha ka imlang sahlang ka la pynlong ïa uwei na ki nongthoh ba pawnam ka jylla, u Fr. Barnes Mawrie ban pynmih da ki ar tylli ki kot kyrpang na ka bynta ki khynnah skul ba kin long ki nuska bad ki nongmait lynti ban wallam pat ïa ka burom ba la jah ba ka Jaidbynriew ka don baroh shi katta.
Haba kren shwa kum u Kongsan ban pyllait ïa kitei ki kot ba la ai kyrteng, “Developing my Personal Self” bad ruh ïa ka, “Developing my Social Self”, u Archbishop Dominic Jala u la ong ba kane ka sienjam ka long ruh
kumno ban pynim ïa ka kolshor kaba ka pateng ban wan ka dei ban nang ym ban shu tip.
Shuh shuh u la ong ba kaba kham kongsan kadei ka rukom jinglong shimet ha ka lynti kaba dei kaba lah ban wanrah ïa ka jingkylla wat ha ka rukom im ha ka imlang sahlang. Nalorkata, u Archbishop u la kdew ruh halor ka jingbym nang shuh jong kane ka pateng samla mynta ïa ki tymmen ki san. “Ki samla mynta kim nang shuh ban burom ïa ki tymmen ki san kumba long mynshwa. Ngi ïohi ba ha ka por elekshon ki burom ïa ki tymmen ki san hynrei haba phi ïaid pat ha ki lynti syngkien bad ha ka imlang sahlang kam don satia,” u la ong.
U Archbishop u la ong ruh ba dei ka rukom im kaba pyni tynnad ïa ka imlang sahlang. “Ngi don ka jingkitkhlieh na bynta ka lawei ban wan ba kan don ka imlang sahlang kaba suk ba shngaiñ kaba lah ban urlong lyngba ka jingtip ïa ka burom ka akor ha ka imlang shlang,” u la ong da kaba bynrap ba u don ka jingkyrmen ba kin don bun kiban myntoi na kitei ki kot ba la thoh da u Fr. Barnes.
Na ka liang u nongthoh pat, u Fr. Barnes u la ïathuh ba ha kitei ki kot u la batai bniah kumno ban pynskhem ïa ka nongrim ha ka jinglong briew khamtam eh lyngba ki heprit ha ki skul. U pynpaw ruh ïa ka jingkyrmen ba kito kiba pule ïa ka, kin tip bad nang ban burom ïalade bad ïa ka imlang sahlang khamtam eh ïa ki tymmen ki san.
La sdang ïa katei ka prokram da ka jingduwai na u Fr. Gervasis, nangta ka jingkren sdang na u Fr. John Sohshang bad la pynshongkun ïa ka jingialang da ki jingrwai na ka Choral Evangelists bad khynnah skul ka Sacred Heart Girls HSS nalor ka jingdonlang jong kiba bun kynthup naduh ki Sister, ki Principal jong ki jaka pule bapher bapher nalor kiwei kiwei.