Press "Enter" to skip to content

Bitar lep ki MDC ïa u CEM ba pyneh ban pynheh ïa ka song pisa MDC skhim

Kpait thaw jot ka UDA ha KHADC

Shillong, Ïaiong 12: Ki MDC ka United Democratic Alliance (UDA) ba synshar ïa ka Khasi Hills Autonomous District Council (KHADC), kila bitar lep mynta ïa u Chief Executive Member (CEM) Bah Teinwell Dkhar halor ka jingkynnoh ba um pynsngap ïa ka jingdawa ban mang kham bun ïa ka song pisa Special Plan Assistant ba T.34 klur sha ka skhim MDC.
Ki MDC jong ka UDA kila pynpaw ïa ka jingbym hun ïa ka rai jong u CEM ban mang tang mar T. 50 lak sha ka skhim MDC bad buh jingkylli ruh halor ka jingthmu ban mang pisa biang da ki klur tyngka sha ka project Khasi Traditional Cultural Centre ha Jingkiengkalong kaba la dep mang haduh T. 6 klur na ka song T. 133 klur jong u snem 2016-2017.
Lah ban kdew hangne ba u CEM ula shim rai ban mang ïa ka bhah ba mar T. 50 lak sha ki 29 ngut ki MDC na ka Special Plan Assistant ba T. 34 lak kum ka skhim MDC jong u snem 2019-2020.
Ka KHADC kala ïoh ïa ka song pisa T.52 klur kum ka Special Plan Assistant (SPA)-2019-2020 na ka Sorkar Pdeng bad na kane ka pisa, ka Council haduh mynta ka dang ïoh pdiang tang T. 34 klur na ka Sorkar Jylla.
Kat kum ka khubor bala ïoh, ki MDC jong ka UDA kila shong jingïalang hynnin ka sngi palei ha ryngkat ka jingiadonlang jong u CEM bad kila dawa na u CEM ban mang pynheh noh ïa ka skhim MDC na ka song pisa hynrei kane ka jingdawa kam shym la seisoh satia.
“U CEM u pyneh beit ïa ka jingdawa jong ngi ki MDC ban pynheh ïa ka mang tyngka sha ka skhim MDC. Kane ka jingleh jong u CEM kala pynbitar mynta ïa kiba bun ki MDC namar ka jingbym sngap lang ïa kiba bun balang” ong ki MDC ka UDA haba ïa kren bad u nongthoh khubor bad kynnoh “U CEM u shah pynïaid ha ki katto katne ki MDC ki ban sa pynpra phom ïa ka kynhun synrop UDA”.
Ka kynhun synrop UDA kala ‘kpait thaw jot (sdang orpait) mynta na ka jingïapher jingmut halor ka song tyngka T. 34 klur bad bun ki MDC kila sdang ban ïakynduh sopsop ha kaban pynkhyllem noh ïa u Bah Teinwell na ka shuki CEM.
Ka kynhun synrop UDA ka don 19 ngut ki MDC ha ka liang jong ka ba kynthup ïa ki MDC jong ka kynhun synrop Regional Democratic Alliance (RDA) jong ka United Democratic Party kaba don 7 ngut ki MDC bad HSPDP-2 ngut lem bad ka kynhun synrop Peoples Democratic Alliance (PDA) ba 10 ngut ki MDC jong ka NPP kaba don 7 ngut ki MDC, PDF-1, MDC shimet 2 ngut.