Press "Enter" to skip to content

Bym biang Doctor bad dawai, jurip ka HYC ïa ka Warmawsaw PHC ha Ri Bhoi

Nongpoh, Ïaïong 12: Ka HYC Ri Bhoi Sepngi Circle ha ka sngi Balang jong ka taïew ka la hiar syndon ban leit jurip ïa kawei na ka jaka ai jingsumar paidbah ha Warmawsaw, kaba dei ruh hadien ka jingujor na ki paidbah halor ka jingbym biang Doctor bad ka jingbym wan thikna ki nongtrei kaba la buh jingeh ïa ki paidbah ha ka pang ka shitom.
Ha kane ka jingleit jurip la ialam dau Publicity Secretary, u Bah Alfred Lyngdoh bad la synran lang ruh da ka jingdon lang ki nongialam bad ki dkhot ka seng ba hap hapoh ka Ri Bhoi Sepngi Circle.
Kum ban pyntip sha ki paidbah, katei ka jaka ai jingsumar la tip kum ka Warmawsaw PHC ha kaba la pynaid pat da kawei ka Company ba la tip kum ka Karona Trust bad kane ka PHC ka hap ban ai ka jingshakri ha ka pang ka shitom palat spah tylli ki shnong ba hap ha ka thaiñ Warmawsaw hapoh ka Jirang C&RD Block ha Ri Bhoi District.
Haba kren sha ki lad pathai khubor, u Publicity Secretary ka HYC, u Bah Alfred Lyngdoh u la ong ba ka seng ka dap shisha da ka jingsngewkhia halor ka jingbym biang Doctor bad ka jingduna ki Nongtrei ha katei ka jaka ai jigsumar, bad ka jingbym biang doctor ka buh ïa ki paidbah hapdeng ka jingeh kaba khraw ha ka pang ka shitom bad khamtam ha ki por ba donkam kyrkieh ki nongpang ban ioh  jingïarap da ki Doctor.
U la ïathuh ruh ka daw kaba la pynlong ïa ka seng ban hiar jurip sha katei ka jaka ai jingsumar ka dei halor ka nongrim ba ka seng ka la ioh pdiang shibun ki jingud ki jingnam na k paidbah bad dei halor kane ka nongrim ka seng ka la jurip bad ka sakhi ruh ba ka long shisha kumba  pynpaw da ki paidbah halor ka jingbym biang Doctor bad ki nongtrei.
Namarkata, ka seng ka pynrem jur ïa ka jingleh mon ki Doctor bad ki Nongtrei bad kum ka seng ka dawa ruh mardor na ka sorkar bad khamtam na ka tnad ka koit ka k hiah ba kin jurip bad ban pynshitom halor kine ki kam lehmon ki Doctor bad ki Nongtrei ba ki paidbah pat ki kynduh mawsiang ha ka pang ka shitom, u la ong.
Shuh shuh, halor ka jingbym biang dawai ha katei ka jaka ai jingsumar na ka liang ka seng ka la dawa ruh na ka sorkar bad na ka tnad ka koit ka khiah ba kan pynbiang thikna ïa ki dawai khnang ban pynsuk ïa ki paidbah ha ka pang ka shitom bad khamtam kito ki longing baduk kiba ym kot bor ban thied dawai na ki pharmacy shimet, u la bynrap.