Press "Enter" to skip to content

Die u bar jylla da ki jingbam ba la kut por, khynra ki samla Madanryting

Shillong, Ïaïong, 12: Ki dkhot jong ka Seng Samla Madanryting mynta ka sngi thohdieng ki la hiar khynra ïa kawei ka dukan jong uwei u bar jylla uba shong die dukan ha ka Block-F jong ka shnong Madanryting hadien ba ki la ïoh ujor na ki paidbah nongshong shnong ba une u bar jylla u ju die ïa ki jingbam sha khyllung khynnah da ki song jingbam ba la sniew bad kiba la kut ka por.
Ïa une u bar jylla la tip kyrteng kum u Ram Chander uba sah ha ka shnong Demthring, Shillong bad ïa ka dukan jong u la tip kyrteng kum ka RC Store.
U President ka Seng Samla Madanryting, u Bah Roderick A. Rajee haba pyntip sha u nongthoh khubor, u la ong, “tang shu ïoh ujor na ki paidbah, ka seng samla ryngkat ka jingïadonlang u Rangbah Dong ka Block-F, u Bah Ricky E. Lyngdoh ngi la hiar khynra bad ngi lap shisha ba u Ram Chandal u die da ki song jingbam ba la kut ka por khamtam sha ki khynnah skul.” U la ïathuh ba ka Dorbar Shnong ka la shu maham ïa une u bar jylla ba um dei shuh ban dang ïai die ïa kine ki jingbam ba la sniew bad ba la kut noh ka por.
Ha kajuh ka por, ka Dorbar Shnong ka la hukum ïa u Ram Chander ba u dei ban wanrah ïa ki kot ki sla ha u Rangbah Shnong ha ka ka sngi baar jong ka taiew ban wan.