Press "Enter" to skip to content

Donkam ban pynbha ïa ka jingpule Theology ha ka thaiñ NE: Fr. Mawrie

Pynkupburom ka JRTS ïa 43 ngut ki samla ba pyndep pule B.D
Shillong, Ïaiong 12: Ka John Robert Theological Seminary (JRTS) kala pynkup burom kyrpang ne ka Valedictory Service, ïa ki 43 ngut ki samla kiba la pyndep iaka jingpule Bachelor of Divinity (B.D) kiba wan na kylleng ki jylla bad ki ri ba marjan kum na Bangladesh bad Nepal bad ruh ïa ki saw ngut kiba pyndep iaka jingpule Diploma in Christian Studies.
Ïa kine ki samla la pynkup burom da u President ka Governing Board, Rev W.C. Khongwir ha ka jingialang kaba la pynlong hapoh ka Chapel jong ka. Ha kane ka sngi la iadon ryngkat lang u Fr. Dr. Barnes L. Mawrie, President Sacret Heard Theological College uba long u kongsan, u Rev. Dr. B.J Syiemlieh Principal, Rev. Dr.B.S. Sohkhlet Vice Principal, ki Pastor jong ka KJP Assembly, KJP Synod Sepngi, KJP Synod Mihngi, Ri-Bhoi Synod, ki nongmihkhmat na ki Jingiaseng Kynthei, Jingiaseng Samla ki kmie ki samla jong ki samla pule lem bad kiwei kiwei.
U Fr. Barnes L. Mawrie, haba ai jingkren ha kane ka sngi ula ong ba la donkam haduh katta katta ba kumno ban pynbha ia ka jingpule shaphang U Blei (Theology) hapdeng ka jingkylla jong ka por khamtam ha ka thain shatei lam mihngi (North East) baroh kawei, namar ka jinghikai kiba mynshuwa ka la iapher bad ka jinglong jingman ka juk kaba mynta.
Ula pynkynmaw shaphang u Jisu ba ula ialap ha Nasaret da kaba kdew na ka Gospel Lauksa 4:18-19, “U Mynsiem U Trai, u hanga; naba ula pynsleh ia nga ia ka ban ialap ia ka gospel ha kiba duk; ula phah ia nga ban pynbna ia ka jingpyllait ha kiba la set byndi, bad ia ka jingpynlait pat ha kiba matlah ban pyllait noh ia kiba la ban ka shitom: ban pynbna ia ka snem ba pdiang hun jong U Trai.”
U Fr. Mawrie ula ong ba ha India baroh kawei ki dang don haduh 90 per cent ki bym tip ia U Jisu bad khristan ki don tang 2 per cent eiei bad kane ka khot lang ia baroh ba iansohkti lang kawei ban pynphriang ka Khubor ba bha sha kiwei kumba U Trai Jisu ula leh.
Nalor kane ula ong ba kum ka thain NE ki don shibun bah ki riti ki Dustur, ki ktien ka thylliej bad ki jinglong jingman, ka donkam ia baroh ban ia burom markylliang khlem da ñiew beiñ, namar ka jinghikai kaba la ioh ba Jisu ruh u long ha ka juh ka por u nongpynim bad u nonghikai ba bha u khlem ñiew beiñ iano iano ruh, hynrei ula leh ia ka ba bha bad ban sam ruh iaka Khubor kaba bha.
Shuh shuh ula kynthoh ba bun na ki khristan ba ki kheiñ sting ban shakri ia U Blei ha ki por baroh, hynrei ki kynmaw ia U Blei tang ha ka sngi U Trai bad ha ki jingeh kaba ki mad. Kumta ula khot ia ki samla kiba la pyndep iaka jingpule B.D bad ruh ia kiwei ba kin ieid ban shakri ia U Blei naduh ka Mynsiem khlem da tynkai shuh ialade.
Ha kane ka sngi la pyllait paidbah ruh ia ka Seminary Magazine da u Rev. B.B. Lamin, Moderator KJP Synod Mihngi, katba ka Kong Streamlet Dkhar kala pyllait paidbah ia ka kot ba la thoh da u Rev. J.M. Passah kaba la ai kyrteng “Domestic Violence and Matrilineal Society, Recapturing Khasi Theological and Ethical Values”, ha kane ka sngi la ioh ruh ki jingrwai ba kyrpang na ki samla pule B.D bad ruh ka jingai khusnam sha ki samla kiba tbit bha ha ki jingpule ha ki kyrdan kiba pher bapher.