Press "Enter" to skip to content

Hukum ka HC ïa ka sorkar BJP ban shah mane biang ïa ki Khristan ha UP

Shillong: Ka Allahabad High Court ha ka sngi thohdieng, ka la hukum ïa ka sorkar BJP ha Uttar Pradesh ban plie biang ïa ka ïingmane ha Siddharth Nagar District jong ka jylla Uttar Pradesh bad ban ai jingïada ïa u Pastor Satyen Biswakarma jong ka Balang.
Katkum ka khubor ba la phah da u AC Michael, uba long u Development Director jong ka Alliance Democratic Freedom(ADF), India bad u dkhot jong ka Delhi Minority Commission, la ïathuh ha ka 16 tarik u Nailur 2018, ki briew kiba la kam ïalade na ka tnad syntiat, ki la rung ha ïingmane bad ki la ring dur ïa ka jingshakri Blei kaba la long ha katei ka sngi. Hadien kane la wan sa ki Pulit ka jylla, kiba la maham ïa u Pastor ban sangeh ka jingmane bad bthah ïa u ba udei ban da ïoh jingbit shuwa ha shuwa ba un pynlong kino kino ki jingshakri Blei.
Naduh katei ka sngi, kane ka ïingmane kam shym la ïoh shuh ban pynlong ïa ki jingshakri bad ka la shu khang tala.
Ka kynhun ki nongsaid aiñ jong ka ADF, ki la shimti ïa kane ka kam bad ujor sha ka ïingbishar jong ka Allahabad. Kane ka ïingbishar ka la shong bishar ïa kane ka kam mynta ka sngi bad bthah ïa ka sorkar jylla ban plie noh ïa kane ka ïingmane bad ban ai jingïada ïa u Pastor bad ki kdhot jong kane ka Balang.
Ka ADC ka ong ba kane ka hukum jong ka ïingbishar kan pynlah ïa kane ka Balang ban pynlong jingïaseng noh naduh kane ka sngi U Trai ban wan bad khamtam eh ban ïoh rakhe ïa ka Good Friday bad Easter Sunday, khlem don jingpynwit eiei.
Ka Mrs. Tehmina Arora, Director jong ka ADF India, haba pynpaw ka jingsngewkmen ïa kane ka rai jong ka ïingbishar, ka la ong ba kane karai kadei kaba baroh ki pdiang sngewbha bad khamtam eh kadei ka rai ka ban ïada ïa ka hok jong ki kynhun niam rit paid ha ri India. “ La pyndonkam da ki bor treikam ka sorkar ban thombor ïa ki Khristan kaba long ka jingïuh roit ïa ka hok ban kab don ha ki Article 14, 19, 21, and 25 jong ka Constitution of India”, ka la ong.
Lah ban kdew hangne ba ïa ka sorkar ha jylla Uttar Pradesh la synshar da ka Seng BJP, ha kaba u Yogi Adityanath, uba long u riewniam Hindu.