Press "Enter" to skip to content

Kyntait u Sordar ïa ka jingkynnoh thang ïing ha shnong Kut

Shillong, Ïaïong, 12: U Sordar Shnong jong ka Kut, u Bah Chesterwell Sohtun, u la kyntait war ïa ka jingkynnoh ba u donkti ban wiang ding ïa ka iing sah jong ka Kong Aibullin Mylliem ha ka shnong Kut, kaba hap ha Mawryngkneng Constituency.
Ha ka jingïakren bad ki lad pathai khubor, u Bah Chesterwell Sohtun u la ong, “ngim don jingtip eiei ba kan don ka jingpluh iing hapoh ka shnong Kut ha ka 6 tarik mynta u bnai hynrei ngi kyndit haduh katta katta ban ïoh pule ha kawei na ki kotkhubor ba la kynnoh ba ngi leit thang ïa kane ka iing jong ka Kong Aibullin Mylliem.”
U la ïathuh ba kane ka longkmie ka la mudui ruh da ka ejahar ha ka 9 tarik mynta u bnai sha ki pulit ka Mawryngkneng Police Sation pyrshah ïa u bad ïa arngut ki paralok jong u da kaba kynnoh ba ki dei kiba donkti ban wiangding ïa ka iing sah jong ka.
Halor kane, u Sordar u la pynshai ba kane ka longkmie kam shym la wan pyntip eiei ïa ka jingpluh ka iing ing jong ka ha ka 6tarik mynta u bnai hynrei ki paidbah nongshong shnong ki la ïoh jingtip na ki lad pathai khubor ha ka 10 tarik mynta u bnai.
“Ka Kong Aibullin watla ka sah hapoh ka shnong Kut, hynrei kam ju sah satia hapoh shnong namarba ka leit khaii shabar jong ka shnong, hynrei halor ka jingpluh ka iing jong ka, ngim don jingtip eiei tad,” ula ong.
U la kynnoh ruh ba ka Kong Aibullin ka dei kaba ju thaw jingkulmar hapoh shong bad kam ei ruh ïa ka jaka rep bad pyndik laiphew jait lada kam ïoh ïa kaei kaba ka kwah. “Ym tang katta, ka la mudui ejahar ruh wat ïa ki Sordar Shnong kiba rim bad mynta sa ïa nga,” ong u Bah Chesterwell.
“Ka Kong Aibullin bad ka kmie jong ka, ka Elphida Mylliem kim ju ngeit ïa ki kyndon jong ka shnong ka thaw bad ki ju tam pud ïa ki jaka rep na ka shi akar sha ka shiphew akar dei na kata ka daw ba ka shnong kam pdiang da leilei ïa kine ki jingleh jong ka Kong Aibullin,” ong u bah Chessterwell.
Ha kajuh ka por ki bor pynïaid shnong ki la maham ïa kane ka longkmie ba ka dei ban ym leh pyrshah ïa ka aiñ jong ka shnong.