Press "Enter" to skip to content

Thung ka NEHU da ka Inquiry Committee ïa ka jingkynad ka NEHUSU bad u Pro VC

Shillong, Ïaïong, 12: Ka North Eastern Hill University (NEHU) mynta ka sngi thohdieng ka la thung da ka Inquiry Committee ban tohkit halor ka jingïakynnoh ba mar kylliang kaba la mih na ka liang jong u Pro Vice Chancellor ka NEHU, Tura Campus bad na ka North Eastern Hill University Students Union (NEHUSU).
Kum ban shu kdew hangne, ki bor pynïaid jong ka NEHU, Tura Campus ki la mudui da ka ejahar pyrshah ïa ki nongïalam ka NEHUSU da kaba kynnoh ba ki la thaw jingkulmar bad kawang dusmon da ki maw ïa ki jingkhangiit jong ka iingsah jong u Pro Vice Chancellor (PVC) jong kane ka skulbah, u G Singhaiah kaba don ha Tura, West Garo Hills dang shen bad la kynnoh ruh ba ki la ktah kti ïa ki 7 ngut ki nongbylla sngi kiba trei hapoh kane ka Campus.
Katba na ka liang ka NEHUSU, ka l a kyntait war ïa kane ka jingkynnoh bad pynksan ba ki nongïalam ka Union kim shym la ktah satia ïa ki nongbylla bad kim shym la donkti satia ban kawang maw ïa ka iing sah jong Pro VC bad ñiew ruh ïa kine ki jingkynnoh tang ki ’tien lamler suda.
Ha ka jingïakren bad ki lad pathai khubor hadien ka jingïakynduh ïa u Vice Chancellor ka NEHU, u Prof. SK Srivastava, ka President jong ka NEHUSU ka samla Genuica Majaw ka la ïathuh ba ïa kane ka Komiti yn sa khlieh da u Head of Cultural and Creative Studies, u Prof Desmond Kharmawlang bad arngut ki dkhot, kata, uwei na Main Campus bad uwei na Tura Campus.
“Ka jingïakynduh jong ngi ïa u Vice Chancellor ka long halor kajingjia ha Tura Campus bad ngi ruh ngi kwah ba jingïasuk kan wan biang. Ngi la aiti da ka dorkhas jingdawa ha u Vice Chancellor ban dawa ba dei ban thaw da ka Inquiry Committee,:” ong ka Samla Genuica.
Ka la ïathuh ruh ha kane ka dorkhas jingdawa, ka Union ka dawa ïa u Proctor u Gino A. Sangma bad ïa u Pro-Vice Chancellor jong ka NEHU Tura Campus, u G Singhania ba ki dei ban panmap bad ban weng lut ïa baroh ki jingkynnoh pyrshah ïa ki nongïalam ka NEHUSU. “Ngi kyrmen, lyngba ka jingthaw ïa ka Inquiry Committee ngin ïoh ïa ki jingdawa,” ka la ong bad bynrap, “namarba ka dei ka kam poh iing ngi kyrmen ba yn lah ban pynkut noh ha ka por kaba biang.”
“Katba ka jingtohkit ka dang ïaid, lada don kano kano ka jingshahkem na ka liang jong ngi, ngin ym don shuh kano kano ka jingïakren bad ki bor pynïaid (Administration),” ong kane ka President ka NEHUSU.
U Adviser ka NEHUSU, u Samla Rangdajied Marweiñ u la ong ba kane ka jingkynnoh pyrshah ïa ki nongïalam ka Union ka long kaba khia bha. U la ïathuh ruh wat na ka liang u Pro-Vice Chancellor jong ka Tura Campus u la kular ban ïamap bad klet noh halor kaei kaba ladep jia ha Tura Campus
“Hynrei katba ngi dang don ha lynti ban wan phai sha ka Shillong, ngi sngew kyndit haduh katta katta ban ïohi ïa ka jingpynmih khubor da ka Tura Campus pyrshah ïa ki nongïalam ka Uniont bad ban mudui ruh da ka ejahar pyrshah ïa ngi,” ong u Samla Rangdajied.
“Ka President jong ka NEHUSU ka la hap ban ujor kylliang da ka ejahar pyrshah ïa u Proctor namar ka jingknieh jubor ïa ka ID, ïa ki nongbylla namar ka jingkren kynshleiñ bad ïa u Pro-Vice Chancellor jong ka Tura Campus namar ka jingkren ibeiñ ïa ngi. Hynrei ngi kwah pat ban ïasuk noh halor kane ka kam,” ong une u Nongaibuit ka NEHUSU.
Shuh shuh u la ong, lada jia ba uno uno na ki nongïalam ka Union ki shah kem katba dang ïaid ka jingtohkit, ka NEHUSU kan ym treh shuh ban pynlong ïa kano kano ka jingïakren bad ki bor pynïaid jong ka NEHU. U la ong ruh ba ki bor pynïaid kin hap ban shim ha lade ïa ka jingkitkhlieh lada jia eiei hapoh ka Campus. Shwa kane, da ki spah ngut ki samla pule ki la ïaid paidbah na Central Library sha Administrative Block ryngkat ki sur pynrem ïa u Pro Vice Chancellor.
Halor kane ka jingjia, na ka liang ka Khasi Students’ Union (KSU) hynnin ka sngi palei ka la pynrem jur ruh ïa ki briew kiba donkti ban kren khlemakor ïa ka President jong ka NEHUSU bad dawa ruh na ki bor pynïaid ka NEHU ban pynshitom mardor ïa ki.
Ka Seng ka kyntu ïa ki bor pynïaid ka NEHU Permanent Campus ba kin tuklar lem ïa kane ka kam pohïing khnang ba yn lah ban pynbeit hapoh iing bad ban ïapoi noh sha ka jingsngewthuh jingmut bad kyntu ïa baroh ar liang mamla ba lada lah ban shu ïa pynbeit hapoh iing kata hapoh u pud u sam ka NEHU kan bha shibun ba kin weng noh ïa ki ejahar ba ki la ujor sha ki Pulit.
Ka Seng ka ai ïa ka jingkyrshan ba pura ïa ka NEHUSU halor kane ka jingjia bad pynpaw ba ka long kaba kloi wat haduh u pud ba kan hap ban mih shakhmat ban tuklar ïa kane ka kam.