Press "Enter" to skip to content

Yn ïaid rally shah thngan ka HYC ba shah iehbeiñ ka thaiñ Maweit  

Nongstoiñ, Ïaiong 12: Da ka jingsngewkhia ïa ka jingiehbeiñ ka sorkar ïa ka dong ka thaiñ Maweit ha ki liang baroh khamtam ha kaba ïa dei bad ka jingsniew palat liam ka surok Nongstoiñ-Maweit, ka HYC Maweit circle ka la rai ban pynsngew sha ka sorkar Meghalaya da kaba ïaid Rally shah thngan na Maweit shaduh Nongstoiñ.
Kane ka jingïaid rally jong ka
seng kan long ha ka 27 tarik mynta u bnai. Ka rally kan sdang na iew Maweit da kaba pynlong shuwa ïa ka jingïalang ha ka por 9:30 mynstep ha kaba yn ïoh ban pynsngew ïa ki katto katne ki jingkren na ki Rangbah shnong bad ki riew paw khmat jong ka dong ka Thaiñ bad hadien kata, kan sdang ban ïaid noh ha ka por 11 baje mynstep.
U samla Jeremiïa Dkhar President ka HYC Maweit circle ha ka jingïakren bad ki lad pathai khubor mynta ka sngi, u la pynpaw ïa ka jingbynñiaw ïa kane ka jingleh klet bad ka jingleh meinah ka sorkar Meghalaya ïa ka dong ka thaiñ. U la ong ba ka la long kumba kane ka dong ka thaiñ Maweit baroh kawei kam hap shuh ha u pud u sam bad ha ka jingpeit jingkhmih ka sorkar Meghalaya.
U la ong ruh ba ka Seng kan pyrshang biang sa shisien ban leit pynsngew hakhmat u Symbud Myntri Rangbah ka Jylla Bah Prestone Tysong. Hakhmat u Myntri ka tnad PWD, yn pynsngew ïa kine ki jingeh jingjynjar ka dong ka thaiñ, khamtam ïa ka jingsniew palat pud ka surok. Yn dawa ruh ban khot tender kloi kloi ïa ka surok two lane na Nongstoiñ sha Maweit bad shaduh Kulang Nongjri.
U la ong ba ka sorkar Meghalaya ka la khlei ïa ki juban lak hakhmat ki paidbah ka dong ka thaiñ lyngba u Local MLA u Bah Gigur Myrthong, ban wanrah syndon da ka surok two-lane. U la pynkynmaw ba ha ka por ïalap elekshon, u bah Gigur u la kular ban siang rong na Nongstoiñ sha Maweit ha kaba ïa ki jinglut yn lut hi ma u, kata hadien lai bnai lada u poi sha ka thong. Ïa kane u la kular haba kren sha ki paid nongshong shnong ka thaiñ Maweit, hynrei imat u dei tang u nongmihkhmat khleiñ la thang jwat la bam.
“Ka Seng kam kwah ban kynthoh than ïano ïano ïa mynta, hynrei ka shuh pynkynmaw ïa ki kyntien kiba la khlei sha ki paidbah nongshong shnong ha ka por ïalap election. Namar ki paidbah ki la shah skhor bad ap khmih lynti, pynban haduh mynta kam pat paw dak ei ei re kumba la kular” u President ka seng.
Ka HYC Maweit Circle ka buh ruh ka jingkyrpad sha baroh ki paidbah nongshong shnong ka dong ka thaiñ Maweit, kum ka synjuk ki Rangbah shnong, ki sengbhalang, ki seng samla shnong, ki seng longkmie ban ïasnohkti lang ha kane ka jingïaid Rally ka ban ïalam da ka HYC Maweit Circle, kum ka dak ka jingsngewkhia na ka bynta ka jingshah iehnoh beiñ ha ka sorkar ïa ka dong ka thaiñ Maweit baroh kawei.