Press "Enter" to skip to content

Ba shimhia u MLA Mawsynram bad Ranikor, siangrong ïa ka surok Tlongpleng-Balat

Shillong, Ïaïong, 14: Ka jing shna pynbha bad ka jingsiang rong ïa ka surok naduh Tlongpleng haduh Balat ka la sdang shaid shaid hadien ka jing shah ieh beiñ da ki phew tylli ki snem ha ki Nongmihkmat barim.
Nalor kata, wat ka jingkieng ha riat Mawñiuh, ka la jan dep pura artat na ka bynta ban pynsuk ïa ki kali kiba ju ïaid lyngba na kane ka jingkieng kaba don riat ba itriem kaba pynïasoh ïa ka shnong Ranikor.
Lah ba kdew, ka tnat PWD ka la phah ïa ka jngtyrwa sha ka Sorkar Jylla ban mang pisa la kumno kumno T.4.5 klur na ka bynta ban maramot pynbna noh ïa ka surok ba la jot bad sniew haduh katta katta naduh ka shnong Trongpleng haduh Lad Bakli ba jrong 20 kilomitar, kaba dang hap ha Ranikor Constituency.
“Ngi sngewkmen haduh katta katta ban ïohi ba ïa ka surok naduh ka shnong Tlongpleng haduh Balat la shna bad siang rong hadien ba la sah khongreng da ki phew tylli ki snem ïa kaba la shah ieh beiñ ha ki nongmihkhmat kiba rim,” ong ka Hynñiewtrep Youths Council (HYC) Dangar-Balat Border Circle ha u kyrwoh ba la phah da u Organising Secretary, u Samla Teibor Wanniang.
“Ka seng kam lah khlem da ai khublei kyrpang ïa u MLA jong ka Ranikor Constituency u Bah Pius Marweiñ bad ïa u MLA ka Mawsynram Constituency u Bah HM Shangpliang kiba la buddien bad shimkhia ban pynurlong ïa ka jingdawa jong ngi u paidbah ka thaiñ,” ong u kyrwoh na ka seng bad bynrap, “ngim lah ruh khlem da pynpaw ka jingsngewnguh ruh ïa ka PWD lyngba ka ophis u SDO Dangar Sub Division bad u EE ka Mawsynram Division.”
“Ka seng da kaba sngewburom ruh ïa ki Contractor kiba la pyntrei ïa kane ka surok, ka shu don ban kyntu ba kin ïaleh ban kham pynsted ïa kane ka kam namar kumba long mynta, u slap lane ka lyiur ka la hajan bad khnang ba ma phi ruh kum ki Contractor phin ym ïakynduh jingeh ne mad ïa ka jingduhnong lyngba kane ka jingpyntrei ïa ka surok,” ong shuh shuh u kyrwoh na ka seng.
Dang ha u bnai Nohprah, u MLA ka Ranikor Constituency, u Bah Pius Marweiñ, uba don ka jingsngewkhia halor ka jingjot jong kane ka surok, la hiar ban jurip ïa kane ka surok kaba la jot bad pei thliew kaba pynïasoh naduh Mawphlang shaduh Balat kaba jrong 74 kilomitar. Ha kane ka jingjurip la synran lang da u Executive Engineer ka PWD (Roads) Mawsynram Division u Bah A. Umdor bad u SDO, PWD (Roads) Dangar Sub-division, u Bah D. Lamare bad ki Ophisar jong kine ki ar tylli ki tnat.
Ha kane ka jingjurip ïa kane ka surok kaba hap ban ïaid lyngba ruh ïa ka Riat Mawñiuh shwa ban poi sha ka shnong Trongpleng ter ter haduh Lad Bakli, kiba bun ki bynta ki dei kiba la khoh lut ka rong bad ki maw siang surok bad bun tang ka jingpei thliew.