Press "Enter" to skip to content

Dap 4 bnai ba shah tep ki Nongtih dewiong, dang bishar ka Sorkar aiu ban leh?

Shillong, Ïaiong 14: Ka jingshah tep im jong ki 15 ngut ki Nongtih par dewiong ha Khloo Ryngksan kala kynjoh 4 bnai thik hynne ka sngi bad mynta ka Sorkar Jylla ka dang shong bishar ïa ka hukum jong ka Ïingkashari Supreme Court ban rai aiu ban leh haba ïadei bad ki metïap bym pat lah satia ban sei haduh mynta.
Haduh 15 ngut ki Nongtih par dewiong kila shah tem im hapoh ka krem dewiong ba shlei um ha Khloo Ryngksan naduh ka 13 tarik Nohprah 2018 bad haduh mynta ki kynhun ai jingiarap (Rescue Team) ki dang lah ban sei tang artylli ki metïap kiba la pyut.
Ki kynhun ai jingiarap ba kynthup naduh ki shipai Indian Navy, ki NDRF, SDRF, ka IOC bad kiwei kiwei, haduh mynta ki dang pynbteng ïa ka jingtan ïa ka um ba shlei ha kane ka krem dewiong lyngba ki kor jong ka Kirloskar Brothers Ltd hynrei kane ka jing pyrshang jong ki kam shym la lah ban pynrngiat namar ka jingïai shlei shi ïai shlei jong ka um.
Ka Ïingkashari Supreme Court haba bishar ïa ka mukotduma ba pyrshah ïa ka jingthmu ban pynsangeh noh ïa ka jingiawad ïa ki metïap, kala hukum ïa u Nongmudui u Aditya N Pradesh ba un leit twad jingmut na ki bahaïing hasem jong baroh ki nongtih par ba dang sahkut hapoh krem ban pynthikna la ki dang kwah ban ïohtam ne em ïa ka metïap kaba la kem pyut.
Kane ka hukum kala mih na ka Ïingkashari u Justice SA Bobde bad u Justice Sanjay Kishan Kaul, kaba la bthah ruh ïa u nong mudui ban leit synran lang ïa ki hydrologist bad ki Ophisar survey ha ka jingleit jurip ïa kane ka krem dewiong. Ka kashari kala bthah ruh ïa ka Sorkar Pdeng bad ka Sorkar Jylla ba kin ïai bteng ha ka jingiawad ïa kine ki nongtih par ba sahkut hapoh krem.
Lah ban kdew ba u Myntri Rangbah ka Jylla Conrad Kongkal Sangma ula pynpaw ba ka Sorkar Jylla ka lah ban leit buh noh da ka jingkyrshan hakhmat ka Ïingkashari Supreme Court ba kan pynsangeh noh ïa ka jingiawad ïa ki metïap.
Kat kum ka jingong jong u, “Ka Supreme Court kala kren shai ba ngim lah ban pynsangeh ïa ka jingiawad ïa ki met jong ki nong tih par. Ngi hap ban leit kyrpad ïa ka Supreme Court ban pynsangeh noh namar kiba bun ki daw”. Ka khubor ba ïohlum ka ïathuh ba ka Sorkar Jylla ka dang shong bishar ïa ka hukum jong ka Ïingkashari bad ïa ka rai ban leit buh ïa ka jingkyrpad, yn sa shim ha kine ki khyndiat sngi ban wan.
Ka khubor ka ïathuh ba ka Sorkar kala buhteng ban shimrai ïa kane ka kam namar ka jingwan jong ka elekshon MDC bad ka elekshon MP-Lok Sabha ha Jylla.