Press "Enter" to skip to content

Kyrpad ka Jylla ban pynjynsur ïa ka MCC ha Meghalaya

Shillong, Ïaiong 14 : U Chief Electoral Officer ka Meghalaya, Bah FR Kharkongor u la ong ba ki kyrpad ïa ka Election Commission jong ka Ri ba kan pynjynsur ïa ki kyndon elekshon ne ka Model Code of Conduct hadien ba ka jylla ka la dep ïa ka elekshon jied MP bad ruh ïa ka elekshon MLA shiteng samoi ha Selsella.
“Watla ka jingthep vote ka la kut ha ka 11tarik, hynrei ka Model Code of Conduct (MCC) ka dang neh namar kan dang don sa ka jingthep vote biang,” ong u CEO dang shen haba kren bad ki lad pathai khubor.
Katei ka jingkren jong u kadei hadien ba ka tnad Election ka Jylla ka la thoh biang sha ka Election Commission ka Ri ban pynlong biang ïa ka elekshon jied MP ha Tura bad ïa ka elekshon MLA shiteng samoi ha Konarchar Polling Station, kaba hap ha Selsella hadien ba ka la don ka jingbakla pyndait ïa ki kor thep vote MP bad MLA. Halor katei, ka EC ruh ka la pynbna ba ka 15tarik mynta u bnai, kata mynta ka sngi Nyngkong ki paidbah nongthep vote jong ka Konarchar Polling Station kin leit ban pyndep biang ïa ka hok jied MP bad MLA.
Haba kren halor ka MCC, u Bah Kharkongor u la ong, “Ngin sa kren bad ka Commission ban pynjynsur ïa kane ka kyndon ha ki khep ki khep bad mynta ngi dang ap ïa ka jubab na ka Election Commission.” Katkum ka jingong jong u, katei ka kyndon kan treikam beit ha kane ka jylla wat hadien ka elekshon ruh katba ym pat dep ïa ka jingñiew vote ha baroh kawei ka ri.
Lah ban kdew hangne ba ka jingpynbna pyntreikam ïa ka MCC ka la sdang naduh ka sngi ba pynbna ïa ka tarik elekshon, kata naduh ka 10tarik u Lber, 2019 bad kane kan neh haduh ka sngi ñiew ïa ki vote ha baroh kawei ka Ri, kata ha ka 23tarik u Jymmang, 2019.
Mynta ka kynti ruh, ka elekshon sha Lok Sabha la pynlong ha ki hynñiew bynta (Phase) na ka bynta ki 543 constituency kiba don ha ka Ri baroh kawei bad kane ka la sdang naduh ka 11tarik u Ïaiong bad kan kut pat haduh ka 19 tarik u Jymmang mynta u snem hi.
Ki jylla kiba la pyndep ïa ka jingthep vote ha ka Phase – I kaba long ha ka 11tarik u Ïaiong ki kynthup ïa ka Andhra Pradesh (25 parliamentary constituency), Arunachal Pradesh (2), Assam (5), Bihar (4), Chhattisgarh (1), Jammu and Kashmir (2), Maharashtra (7), Manipur (1), Meghalaya (2), Mizoram (1), Nagaland (1), Odisha (4), Sikkim (1), Telangana (17), Tripura (1), Uttar Pradesh (8), Uttarakhand (5), West Bengal (2), Andaman (1) bad Lakshadweep (1) .