Press "Enter" to skip to content

Mih paidbah ki 16 shnong ban pynkhuid ïa ka Wah Umran bad Wah Umlew

Dap da ki bilor kyiad bad plastik ha ki wah
Nongpoh, Ïaiong, 14: Ka long kaei kaei kaba sngewsih bad bun na ki wah ba khuid bad itynnad ha ki por ba mynshuwa kiba dei ruh ki jaka ba bun eh ki dohkha bad ruh ki wah kiba lah ban pyndonkam ha kiba bun rukom bad ai jingmyntoi ïa ki paidbah naduh ka sum ka sait, ka umdih bad kiwei kiwei ki jingdonkam ki la kylla long pynban tang ki nala um bad jaka pyntuid jaboh jongno re jongno bad ka jaka bret ïaki jakhlia jakhlaid kaba la pynsniewdur shikatdei ïa ki Wah bad ka mariang.
Halor katei ka bynta da ka jingsngewkhia kaba jur ki paidbah jong ki 8 tylli ki shnong kiba don marjan bad ka Wah Umran bad ki 8 shnong kiba don marjan bad ka Wah Umlew ha Ri-Bhoi ki la ïa mih paidbah ha ka sngi Saitjaiñ ban leit pynkhuid ïa kitei ki 2 tylli ki Wah kiba pawnam bad kiba itynnad ha Ri-Bhoi, bala pynlong da ka Synroplang Wah Umran bad ka Wah Umlew Protection Committee ryngkat ka jingtreilang bad ki Dorbar Shnong.
Kaba sngewsih bad sngewdiaw ban ïohi ha katei ka sngi ka jingmih paidbah ki nong shong shnong naduh ki rangbah ki samla, ki longkmie bad khynnah ban pynkhuid ïa ka Wah Umran bad Wah Umlew kiba dei ki wah ba khuid bad itynnad ha ki por ba mynshuwa ki la kylla long pynban tang ki nala bret bad pyntuid jaboh jong ki riew isih mariang, ba kitei ki wah ki dap smam da ki plastik, ki bilor kyiad bad ki jaboh jabaiñ ba la isih bad ijli khaid ïa ka jinglong jingman kitei ki Wah. Hynrei ka jingkylli kaba mih ka long ba lano ki paidbah kin sngewthuh halor ka khuid ka suba? Haba bun na ki Wah ba khuid ba itynnad bad ka mariang sawdong sawkun ki la kylla long ki jaka bret ñiut bad jakhlia.
Na ka liang ki paidbah kiba la mih ha katei ka sngi ki la buh ruh da ki jingthoh bad jingmaham ba ki briew kim dei ban leh khlem akor bad bret pathar ïaki jaboh jabaiñ sha ki wah khamtam kito kiba ju sngewtynnad ban wankai bad bam khana ba kim nang ban lehkhuid leh suba, da kaba rah ryngkat bad ki placard halor ka jingdonkam ban pynneh pynsah bad sumar ïa ki Wah ryngkat ki signboard bad ki jingthoh ban mana ïa ki paidbah ba kim dei ban dusmon ïa ki dohum dohwah, ban pynjaboh bad bret jakhlia bad bilor.
Haba kren sha ki nongthoh khubor u Bah Belti Syiemlieh President ka Synroplang Wah Umran u la pynpaw ka jingsngewkhia ban ïohi halor ka jingkylla dur ka Wah Umran kaba dei ka Wah kaba ki paidbah ki ïoh jingmyntoi bad pyndonkam ha kiba bun rukom ha ki por ba mynshuwa naduh ka sum ka sait, ka umbam umdih bad kiwei kiwei ki jingdonkam hynrei mynta pat ka la kylla long tang kum ka nala pyntuid jaboh kaba dap satang da ki jaboh jabaiñ, ki plastic ki bilor kyiad na ka jingkhlem akor jong ki briew kiba la pynlong jaka bret jakhlia ïa ki Wah.
U la ong ruh hadien ba la dep ban pynkhuid yn sa thoh ïa ki jingmana ha ki maw ha shilynter jong ka Wah ba ki paidbah ki dei ban sngewthuh ban sumar ïa ki Wah bad ym ban dusmon bad pynjot lane pynjaboh ïa ka.
Na ka liang u Bah Braveman Nongrum President ka Wah Umlew Protection Committee, bad u Bah Robert Dympep Rangbah Shnong ka Nongtraw haba kren ha katei ka sngi ki la pynpaw ïa kajuh ka jingsngewkhia bad ka jingsngewsih halor ka jingkylla dur ka Wah Umlew kaba dei kawei na ki Wah ba pawnam ha ki thaiñ Umroi kaba don ruh ka jingitynnad halor ka jingkhuid bad ka jingbun ki dohkha ba ki paidbah ki ju sngewtynnad ban sum ban sait bad ban tong umdih bad ban khwai, hynrei kaba sngewsih ka long ba katei ka Wah kala jaboh khaid bad isih ban peit da ka jingdap ki jaboh jabaiñ ki plastic, ki bilor kyiad ba ki paidbah ki bret pathar sha katei ka Wah kaba dei ruh naduh ka jingwan ka Shillong Bye Pass ba ki briew kim kheiñ kor shuh ïa ka jingitynnad ba jingkhuid katei ka Wah.
Kitei ki 2 tylli ki seng ryngkat ka jingïatreilang bad ki Dorbar Shnong ki la buh ka jingmaham kaba tyngeh nangne shakhmat ba ki paidbah kim dei ban leh kulmar bad pynjaboh ïa ki wah, ban pynpaid ïa ki bilor kyiad ha kaba tang ban ïaid ruh ym nud shuh namar ka jingbun ki bilor pait bad buh ruh ka jingmana ba kim dei ban shohdoh, wieh dawai, kawang bom bad dusmon ïa ki jingthaw ba im ha wah kiba pynduhjait ïa ki dohum dohwah, hynrei ba kin sumar ïa ka khnang ba ka jingitynnad ba ka jingkhuid jong ka wah kan neh bad lada lap na ka liang ki bor shnong bad kitei ki 2 seng kin sa kem bad leh da kaba tyngeh ryngkat ka kuna kaba heh.
Ki la ïa wer ruh ïa ki paidbah ba kin ai ka jingïatrei lang naduh ki nongshong shnong bad kiwei kiwei ki paidbah kiba wan kai nabar ba kim dei ban leh khlemakor bad pynjaboh ïa ki Wah bad ha ki sawdong sawkun khnang ba ka jingitynnad ka mariang kan neh bad doh um kin ym duhjait na ki Wah, ba ki khun ki kti bad ka pateng ban wan ki ïohi ïa ka jingkhuid bad itynnad jong ki wah bad ïoh ban pyndonkam ïa ki ha kiba bun rukom ki jingdonkam jong ki.