Press "Enter" to skip to content

Mynta ka sngi yn thep vote MP, MLA biang ki 712 ngut ha Konarchar PS

Shillong, Ïaiong 14 : Ki paidbah nongthep vote jong ka Konarchar Polling Station kaba hap ha Selsella Assembly Constituency mynta ka sngi Nyngkong kin leit ban thep vote biang sa shisien, hadien ba ka Election Commission jong ka Ri ka la pynbna ba ka vote ba ki thep ha ka 11 tarik mynta u bnai kam treikam shuh.
Lah ban kdew hangne, ba ka Selsella constituency ba kynthup ïa ka Konarchar polling station ki la hap ban thep vote arsien ha katei ka 11tarik, kata kawei na ka bynta ka elekshon MP jong ka Tura Parliamentary seat bad kawei pat na ka bynta ka elekshon MLA shiteng samoi na ka daw ka jingkhlad noh u MLA jong ka, u Clement Marak dang shen.
Katei ka jingbthah jong ka Election Commission jong ka Ri kadei hadien ba ka tnad Election jong ka Jylla lyngba u Chief Electoral Officer,
Bah FR Kharkongor ki la pyntip ba ka don ka jingbakla briew ha ka por ba ki pyndait ïa ki kor thep vote jong ka elekshon MLA shiteng samoi jong ka Selsella constituency bad jong ka elekshon MP jong ka Tura parliamentary seat.
Katkum katei ka jingbthah na ka EC, la ong ba katei ka jingthep vote biang da kaba thymmai na ka bynta ban jied ïa u/ka MLA ba thymmai jong ka Selsella bad ruh ïa u/ka MP ka Tura na katei ka Polling Station kan sdang naduh ka por 7:00 baje mynstep jong ka 15tarik tad haduh ka por 4:00 baje janmiet. La bthah ruh ba dei ban pyntip sha ki kyrtong ba aireng nangta sha ki seng saiñpyrthei kumjuh ban pyntip paidbah ha kitei ki jaka ba hap ha katei ka polling station.
Lah ban kdew hangne, katei ka jingthep vote biang ha Konarchar polling station, katkum ka jingïathuh jong u Chief Electoral Officer ka jylla, Bah FR Kharkongor kadei hadien ba ki lap ba ka don ka jingbakla haba ïadei bad ka jingdon ki vote. La ïathuh ruh ba ha katei ka polling station kaba don 712 ngut ki nongthep vote, 674 ngut ki wan ban thep na ka bynta ka elekshon MLA bad 668 ngut pat na ka bynta ka elekshon MP.
Haba kren bad ki lad pathai khubor dang shen, u Bah Kharkongor u la ïathuh ruh ba ha katei ka polling station ki la don ar tylli ki kor EVM, kata na ka bynta ka elekshon MLA bad kawei pat na ka bynta ka elekshon MP. Hynrei la ong ha ka jingbakla briew, u Presiding Officer u la pyndait bakla ïa u ballot unit ba dei na ka bynta ka elekshon MP bad u control unit ba dei na bynta ka elekshon MLA shiteng samoi. Ha kajuh ka por u la ong ba ïa ka control unit ba dei jong ka elekshon MP la kum pyndait bakla bad u ballot unit jong ka elekshon MLA.
U la ong ruh ba mar ïa ïoh jingtip halor katei ka jingbakla, mardor ki la pyntip sha ka Election Commission ryngkat ka jingkyntu ban pynlong biang noh mardor ïa ka jingthep vote biang ha katei ka polling station bad mardor na ka liang ka EC ruh ka la buh ïa ka 15tarik, kata mynta ka sngi Nyngkong kum ka sngi ban thep vote biang ha katei ka polling station.
Lah ban kdew hangne ba ki la don lai ngut ki kyrtong kiba ia khun ha kane ka elekshon MP na Tura seat,kata kynthup ïa u Myntri Rangbah bariim bad Nongïalam ka Liang Pyrshah u Dr. Mukul Sangma na ka Congress, ka MP barim ka Tura ka Agatha K Sangma na ka NPP bad u Rikman G Momin na ka BJP.
Na ka bynta ka elekshon shiteng samoi ha Selsella pat, ka jingïakhun ka long hapdeng ka kyrtong jong ka NPP, ka Ferlene CA Sangma, Sayeedullah Nongrum na ka UDP, Adorsho Sangma na ka BJP bad June Eliana R Marak kaba dei ka kurim jong u MLA ba la khlad noh, u Clement R Marak.