Press "Enter" to skip to content

Sam nep kupthiah ka HANM ïa ki longïing ba shah lynshop ’eriong ha Nonglang

Mawkyrwat, Ïaïong 14: Ka Hynñiewtrep Achik Movement National Movement (HANM) jong ka Mawkyrwat Circle, South West Khasi Hills District, ha 12 tarik mynta u bnai ka la ïoh ban sam nep kupthiah (Blanket) sha ki longïing kiba la shah lynshop ha ka ’erïong ha kine ki khyndiat sngi ba la leit hapoh Shnong Nonglang, Mawkyrwat.
Kane ka jingleit ban sam ïa ki nep kupthiah (Blanket) na ka seng HANM ka dei hapoh ka jingïalam u Lambokstar Marweiñ uba dei u President, u Overlin Marweiñ Adviser bad u bah Amstrong Shylla ha kaba na ka liang ki tiar jong kine ki longïing kiba la shah ktah ha ka ’erïong ki la pynpaw ka jingsngewkmen bad pdiang da kaba sngewbha eh ïa ka jinglong la kloi jong ka HANM ban nohsynñiang.
Ha kane sngi la ïoh ruh ban pynlong ïa ka jingïalang ba lyngkot ha kaba la pynïaid da u bah Amstrong Shylla bad bud sa ka jingkren na u President ka HANM Mawkyrwat Circle u bah Lambokstar Marwein ïa kaba ula pynpaw ba kum ka HANM ka dap da ka jingsngewsih kaba khraw ban ïohi ba ki ïing ki sem jong ki paradoh parasnam ki shah lynshop ha ka ’erïong ’erngit ha une u bnai ba la dep. Kumta ka HANM jong ka Mawkyrwat Circle ka sngewkhia haduh katta katta ban ïohi ïa kum kine ki jingjia ïa ki ïing ki sem ha kane ka dong ka thaiñ bad kum ki nongïalam jong ka seng kim lah ban shong kli kti ne ban shu sngap jar halor kane ka jingjia, hynrei ki la mih shakhmat ban don bynta lang kum ka dak ka jong ka jingïasnohktilang bad ki longïing da kaba ai da ki nep kupthiah (blanket). Shuh shuh ula pynpaw ruh ba kum ka seng kan sa pyrshang katba lah ban pyntyllun ïa ki kam bad ïaitrei shitom ha kano kano ka bynta na ka bynta ka jingbha bad ka jingmyntoi jong ka dong ka thaiñ baroh kawei.
Ha ka jingkren na u bah Wallambok Syiemiong, Chairman jong ka JACSO u la pynpaw ka jingsngewkmen kaba khraw ba ka HANM Mawkyrwat Circle ha ka jingïalam u President, watla u dang shu shimti ïa ka kam ha ki khyndiat bnai kum u nongïalam, ula lah ban pyntyllun ïa ki kam ban kner ne ai isynei ïa ki longïing longsem ba shah lynshop ha ka ’eriong ha shnong Nonglang. Ha ka juh ka por ula ai ruh ki kyntien jingkitbok ba ka Seng HANM kan ïaitrei shitom bad pynkhlaiñ ïa ka seng kaba la ïohthiah baroh shi katta, hynrei mynta pat ka la khie im biang bad ula ong ruh ba u kloi ban ïa pashaid jingmut lem ïa ki nongïalam jong ka HANM lada ki donkam, bad ngeit ba U Blei Un ri bad sumar ïa kine ki longïing longsem kiba la shah lynshop ha ka ’eriong, ba yn ym don kano kano ka jingmynsaw ne jingjia ba sngewsih.
Ïa ki jingai sngewbha ha kane ka sngi la ïoh ban sam da u President ka Seng u bah Lambokstar Marweiñ ha kaba ula kyrpad ruh ia baroh ba kin kynmaw lem ha ki jingduwai ba kum ka seng HANM kan nang lah ban trei ïa ki kam ha ka dong ka thaiñ bad ba kan nang kiew shaphrang ban trei na ka bynta ka ri bad ka jaidbynriew. La pynkut ïa ka jingïalang da ka jingkren aikhublei na u nongpynïaid u bah Amstrong Shylla. Kane ka long katkum ka kyrwoh khubor ba la phah da u bah Lambokstar Marweiñ, President ka HANM – Mawkyrwat Circle South West Khasi Hills District.