Press "Enter" to skip to content

Suh thied ka NPP ha Ri-bhoi ba shah jied u Bah Lapang kum u National Vice President

Shillong, Ïaïong, 14: Ka National People’s Party (NPP) ka la nang suh thied shuh shuh ha ka them Ribhoi hadien ba la thung ïa u Dr DD Lapang kum u National Vice President bad ïa u Samla DS Malai kum u General Secretary ka NPP North East Coordination Committee (NPPNECC).
Ka NPP na Ri-Bhoi District ka la pynpaw ka jingsngew nguh bad ai khubei kyrpang ïa u National President jong ka Party u Conrad Kongkal Sangma uba long ruh u Myntri Rangbah ka Jylla ban bynshet ïa kane ka kam ha u Dr. D.D. Lapang uba la long Myntri Rangbah barim ka jylla haduh san kynthih bad ïa u Samla DS Malai kum u General Secretary.
Haba ïakren bad u Nongthoh khubor u President ka National People’s Party (NPP) Nongpoh Block Committee, u Bah Augustine Wahlang u la ong, “kane ka dei ka burom kaba khraw ïa ngi kum ka Party ha Ri-Bhoi District ka Jylla bad khamtam ïa ka Nongpoh Constituency namar kine baroh ar ngut ki dei napoh ka Nongpoh Constituency khamtam u Dr. D. D. Lapang uba long ruh kum MLA barim jong ka Nongpoh haduh phra sien kynthih. Kane kan long kum shi bynta ruh ban nang pynkhlaiñ ïa ka party ha kylleng ka jylla bad ha ka ri hi baroh kawei namarba u Dr. Lapang u la dei uwei riewrim ha ka kam saiñ hima bad uba la tip lut da baroh ki nongïalam hapoh ka Ri.
“Katba u samla DS Malai uba dei uwei na ki samla rangbah uba long u nongtrei ba shitrhem hapoh ka party, na bynta kane ngi kum ka Party ngi pynpaw ka jingsngewnguh bad ai khublei kyrpang ïa u National President ka NPP u Conrad K. Sangma,” bynrap u Bah Augustine Wahlang.
U President ka National People’s Youth Front (NPYF) Umroi Constituency, u Samla Pynhunlang Ronghang haba bynrap halor kane, u la ong “ngi kum ki samla NPP ngi pynpaw ka jingsngewnguh haduh kata kata ïa u National President u Conrad K. Sangma uba long u Myntri Rangbah ka jylla uba la kloi ban ai ka jingshanniah bad thung kum u General Secretary ka NPP North East Coordination Committee ïa u samla DS Malai uba dei ruh Chief Organizer ka NPYF Meghalaya State Unit bad uba long uwei naki samla uba la paw khmat bha na ka jylla kum u nongtrei ha ka kam imlang sahlang ha ka Ri hi baroh kawei ha ki rynsan kiba pher bapher bad kane ka long kum shi bynta ka jingai mynsiem ïa ki samla ba kin wan sha khmat ban shim bynta ha ka kam imlang sahlang.”