Press "Enter" to skip to content

Thawlad ka MFA ban pynïar ïa ka MBL ha baroh kawei ka jylla

Shillong, Ïaiong 13: Ka Meghalaya Football Assciation (MFA) ka la thaw lad thaw lynti ban pynïar ïa ka lympung ïalehkai Meghalaya Baby League ha baroh kawei ka jylla.
Ka daw kaba la ktik ïa ka MFA ban pynïar ïa kane ka lympung ka dei namar ba ka la ïoh mynsiem bha ïalade, hadien ba ka prokram ïalehkai ba nyngkong, ba la long ha u snem ba la dep, ha kane ka nongbah ka la sei madan ïa ki hajar ngut ki hep barit kynthei bad shynrang, kiba la mih khmat ïa ki 12 tylli ki kynhun, ba la ïakhun ym duna ïa ka 1,300 tylli ki jingïalehkai ha man ba kut jong ka taiew ha ki hynñiew bnai ba la leit noh.
Ha kane ka sien pyrshang ba nyngkong, kiba bun na ki kynhun kidei tang nakane ka nongbah, lait noh ïa ka kynhun ïalehkai kum ka Mawlatbah SC Hawks, Wahlakhiat Bulls, ENE Falcons bad ka Nongtrai Cheetahs, ki long ki kynhun kiba la wan kham na sha jngai ka nongbah.
“Nga sngew kmen ban ong hangne ba ka jinglah ka jong ngi ha kaban pynlong ka MBL, ka wanrah ïa ka dur jingkylla, khamtam lei lei haba ïadei bad katta ka thong kaba ong ha ka ktien phareng ‘grassroots development’, namar ban ïoh ïa ka lad ban plie lad ïa ki khynnah naduh ba ki dang ap sawsnem ka rta ban ïalehkai lang ha ka kynhun bad ban ïoh ban ïalehkai bun bun sien jan shiteng jong ka snem, ka sdang ba kan seng ïa ka nongrim ban lah ban kyntiew ïa ka jingim jong ki” la pynpaw u CEO ka Meghalaya Football Association u bah Arki Nongrum haba ïakren bad ka lad pathai khubor jong ka All India Football Federation.
“Kaba sngewtynnad ka long ba ka jingsei soh ka MBL ha ka snem ba nyngkong ka dei namar ka jinglong ba kloi ki kmie kikpa jong ki khynnah ban ai ïa ka kti kamon ka kti kadiang, kane ka pynrung ha ka jingmut ka jong ngi ba nange shakhmat lada ka lynti ka plie ïa ngi, ngim don jingeh ban pynsaphriang noh ïa ka MBL ha baroh ki bynta jong ka jylla, kaba ngi la buh thong ba ngi lah ba ngin sdang naduh kane ka snem kaba mynta” la bynrap shuh shuh u bah Arki
Nalor ka MBL, ka MFA ka la shat ruh ha ka jingmut ka jong ka ba kan pynkhreh naka bynta ban pynïar ïa la ka lyngkha treikam ka jong ka wat ha ka liang ban kyntiew ïa ka phutbol ki kynthei.
Ban sdang ïa kane, la sngewthuh ba ka MFA kan shim ne bud ïa ki nuksa kumba ka MBL, da kaba lum lang ïa ki khynnah naduh ba ki dang rit bha ka rta, ha kaba yn ïaleh ban plie lad kham kyrpang da kaba pynlong ïa ki prokram ban hikai naka bynta ban ai ïa ka coaching, ka jingpynlong ïa ki lympng ba kyrpang khlem da klet ban ailad lem ïa ki ba kin ïakhun ha ka lympung ka MBL.
Kumban shu pynkyn maw ba ka MBL ka dei ka nongmuna kaba nyngkong eh kaban wan ban mih paw ha ka ri India, hadien ba ka MFA ka la ïoh ïa ka jingkyr shan na ka tata Trust bad ithuh pat ïa ka da ka AIFF, kaba la khring wat ïa ki lad pathai khubor bna nam ha ka ri ban wan ban ha kaban jurip bad ïarap ban pynsaphriang ïa ka khubor ka jong ka ha baroh kawei ka ri.
Dei namar ka jingsei soh palat jong kane ka prokram, ba wat na ka liang ka Tata Trust ka la khlei ïa la ka juban lak ba sa shi snem ka kloi ba kan wan biang ha kane ka jylla ban ai ïa ka jingkyrshan kaba pura ka jong ka ïa ka MFA ba kan khreh ban shim ïa ka sien jam kaba ar ban pynlong biang sa shisien ïa ka MBL mynta ka snem.