Press "Enter" to skip to content

U SOHPETBNENG:

Dr. Dondor Giri Nongkhlaw
Geomorphologist

Ka jingpynlong ïa ka Kdumhawhaw bad ïa u Briew katkum ka ïitkhmih ka jaitbynriew

U SOHPETBNENG: KA JINGPYNLONG ÏA KA KDUMHAWHAW BAD ÏA U BRIEW KATKUM KA ÏITKHMIH KA JAIDBYNRIEW
(U Sohpetbneng: An ethnogenic and aetiological account on the cosmogony of the cosmos and mankind)
Ka lamphang: Ka pyrthei ka dap da bun bah ki jingim
bad ki bym don jingim, kiba rit kiba khraw kum ki
mrad bad ki jynthung. Ha ryngkew ngi ïohi ki mrad kum ki hati, ki dngiem, ki skei, ki shrieh, ki thapbalieh, ki bseiñ, ki khñiang ki ksiah bad ki sim ki doh ba bun jait. Ngi ïohi ïa ki dohkha bad kiwei ki jingim ha um ha wah, ha ki sohmyndur bad ki duriaw. Ruh, ngi ïohi shibun bah ki kynja wieh bad phniang shapoh khyndew. Nalorkata ngi ïohi ki jynthung kum ki phlang, ki kynbat, ki jyrmi bad ki dieng ki siej ha ryngkew. Bad baroh sawdong jongngi ngi ïohi ki maw ki shyiap, ki khyndew, ki at ki them, ki lum ki wah bad ruh ïa ka sngi u bnai bad ïa ki khlur bad kiwei kiwei de ki jynthaw bad jingim.
Ka jingkylli kaba mih ka long ‘kumno kine kiei kiei baroh ki la pet?’ Hato ki jingim ki la pet nyngkong na um? Hato u briew u la pet na u shrieh? Ki jingkylli kiba kum kine ki la don la slem kat ka jingdon ka shaibynriew (civilisation).
Na ïitkhmih ka kyïan (scientific view): Ki stadkyïan (scientists) ki la ai jingbatai bajrong shaphang ka jingpet ka hawhaw bad ki jingim. Ki la batai ba ka pyrthei, kiwei ki metbneng, ki khlur, ki puipui bad ki phngit ba don mynta ki la mih na kata ka jingbthei kaba khraw ïa kaba la ju tip ha jingtip kyïan kum ka Big Bang ne ka jingbthei kaba khraw. Ki da batai ruh ba ka jylli ka sngi bad ki metbneng ki la mih na kane ka jingbthei kaba khraw. Kiwei pat ki stadkyïan ki batai da kumwei ba ka pyrthei ka la wan paw mynta la jin 4500 klur snem lyngba ka jingïatyngkhuh jong artylli ki khlur bakhraw. Katto katne klur snem hadien na ka daw ka shad latom bad shad tawiar jong ka pyrthei la pynlong ïa ki syrtap lyer bad ïa ki um ha ki jingjylliew. Ki da batai ba ha kito ki hyndai bah, ka pyrthei ka don tang kawei ka khyndew metbah kaba ki la jer ka Pangaea ba la ker da ka um suda baroh sawdong. Da ka jingïaishah kynrang bad jingshah pynngam kane ka khyndew metbah ka pait bad per la ka jong bad la pynlong ïa ki hynñiew tylli ki dewmetbah (continents) kumba paw ha ki syor (maps) jong ka pyrthei ba mynta.
Kine ki long ki jingbatai lyngkot ba la lum na ki jynthoh ki stadkyïan na ki jingsngewthuh jong ki. Hynrei, ïa kine ki jingbatai ym shym la pdiang da baroh bad wat hapdeng ki para stadkyïan ym don jingïamynjur. Don kiba pdiang ïa ka jingpet u briew na u shrieh don pat ki bym ïamynjur da kaba buh jingkylli ‘lada u briew u la pet na u shrieh la ar klur snem tam te balei ka jingpet ka kut noh tang ha u briew?’
Na ïitkhmih ka jaidbynriew (the ethnocentric view): ki nia bad jingbatai kiba kum kine kim sdang ne kut tang ha ki stadkyïan (scientists). Nalor kine don sa kiwei ki nia bad jingbatai shaphang ka jingpynlong kiba paw ha ki kotniam jong ki Jew, ki Khristan, ki Muslims, ki Hindu, ki Shaina, ki Greek, ki Babylon terter kiba batai ba ïa ka pyrthei bad jingim la shna janai. Kumjuh ruh, ki khana bym shym la thoh, ki khana ba la shu ïathuh pateng ki don bun ha kiwei ruh ki jaidbynriew ka pyrthei.
Kum ka jaidbynriew kaba la rim, ka jaidbynriew Hynñiewtrep ruh ka don ïa ka jingbatai ïa ki daw jingpynlong ïa ka kdumhawhaw (cosmos) ïa u briew bad ïa kiei kiei baroh kiba im bad bym im katkum ba la thaiñ bad pynsnah khana halor u lum u ba kynjang tam mynkulong ïa u ba la ju tip salonsar kum u Lum Sohpetbneng kumba ngin ïohi harum.
Ka pursaithaiñ (synthesis): La pyrshang ha kane ka jynthoh ban pynwandur da kaba thoh bad ïathuh ter katkum ka pali (sequence) ïa ki jingjia ka jingpynlong naduh ba sdang haduh ka jingwanlong briew u bynriew ha kane ka pyrthei. Kine ki jingjia ki long kum ki lyngkhot (parts) ïa kiba la suh la thaiñ ban pynwandur ïa ka met (whole)jong ka khana. Ïa kane ka jynthoh la sdang da ka jingngeit ba don u Blei. Lah ban don kiba kynthoh ba kane ka long tang ka khana shu thaw hynrei ynda la pynshong pali ïa ki jingjia baroh la shem ba kane ka khana ka long kaba shong nia, balei shong nia? Ka jubab ka long ba u Hynñiewtrep u ngeit ba ka thymmei jong kiei kiei baroh ki sdang na U Blei, ki da ngeit ba u Blei u la don naduh shwa myndang lung myndang kynthong ka kdumhawhaw (cosmos), ka pyrthei bad kiei kiei baroh ki mih na U kumba ngin sa ïohi ha kane ka jynthoh.
Ka dur ka jingpynlong (diagrammatic representation): La ai hangne ïa ki pyrtuitsnah (terminologies) bad ïa ki jingjia kiba don ha ka khana katkum ba ïaid pali. Lah ban ong ba ka khana ba kum kane ka la mih na ka daw jong ka jingbuhai shnong nyngkong ki mynkulong ha ki jaka ba shah, ha ki jaka ba seisoh ba ïoh jingmyntoi ha man la ki liang. Ka jingïashuiñ (contact) bad jingpyndonkam ki mynkulong ïa ki mar mariang bad jingsngewthuh jong ki ïa ki bor mariang ki pynmih ïa ka khana kaba kum kane.
Ha kane ka dur ngi ïohi ba u Blei u long halor duh, kaba pyni ba ki mynkulong ki ngeit ba don u Blei naduh shwa ban sdang kiei kiei. Ki jinghikai niam jong ka jaidbynriew kim shym ïathuh ïangi shaphang kumno ba u Blei u la long hynrei la shu ngeit ba u Blei u la long hi. Palat ïa kane kim lah ban batai da kumwei pat. Bad ïa kane ngi sngewthuh na ka kyrteng u Lum Shyllong uba long u lum bakynjang tam ha ka Bri U Hynñiewtrep bad ïa une u lum la tip hyndai kum u Lum Shulong naba ki ngeit ba une u lum u long u lum ba shong u blei ba ki khot u Shulong. Ka kyntien Shulong ka mut ba ‘shu wan long’ hi khlem kano kano ka bor ïarap ba nabar. U shu long hi. Ha kiwei ki kyntien, ka kyntien Shulong ka long kawei pat ka kyntien ba thew ïa ka kyrteng U Blei.
Ka jaidbynriew Hynñiewtrep ha kito ki por ba dang ïeng rasong ka niam kur jong ki kur ka don bun ki kyrteng ïa u Blei. Ïa u Blei la ong ‘u Blei uba ha jrong ha tbian’, ‘u Blei, u trai kynrad’, ‘u Blei nongbuh nongthaw’, ‘ ka Blei nongsynshar”, ‘ki Blei ba dap da jingisynei’ bad kumta terter. Kane ka rukom khot kam dei ba ki mane bun blei hynrei ka dei katkum ka jingdawa, jingdonkam, jingjia bad rukom trei kam bad rukom pynpaw jubab u Blei ïa u bynriew ha ki por jingeh ne ki por pahuh.
Hadien jong u Blei don sa ka durbar blei. Ka kyntien durbar kam dei ka kyntien ba ngi shim kylliang na kiwei hynrei ka don la ka jingmut. Ïa ka kyntien durbar la pynlong da kaba pakhet bad pynïasnoh na ki ar kyntien, ‘dur bad korbar’. Ka dur jong ka durbar kumba ngi ïohi haduh mynta ka long ba don u riewrangbah kum u nongpynïaid bad ki dkhot kiba la jied man la ka kur ne na ka shnong. Kumta durbar ka mut ‘ka jingkorbar kam ba don ka dur bad iktiar’. Haduh mynta mynne ka jaidbynriew Hynñiewtrep ka don ïa ka durbar kur ha kaba u khlieh dei u longkñi ne u rangbah kur ryngkat kynthei shynrang ba la rangbah jong ka kur, ka durbar shnong ha kaba u khlieh dei u tymmen shnong ne u sordar bad ki dkhot dei ki shynrang rangbah, ka durbar raid ha kaba u khlieh dei u syiem raid ryngkat u lyngdoh bad ki sordar ne tymmen shnong ba don hapoh ka raid bad ka durbar hima ha kaba u khlieh dei u syiem ryngkat u lyngdoh ne lyngskor bad nongmihkhmat na man la ki kur ba don hapoh ka hima. Kumba ngi tip bad ïohi ba don saw jait ki durbar ha sla khyndew ka Bri U Hynñiewtrep kumta ruh ki ngeit ba don ka durbar blei ha bneng. Kumta ha ka durbar blei don u Blei ha khlieh duh wan sa ka Blei bad ki Blei kum ki dkhot weidon. Ha kiwei ki jingngeit niam don kata ka jinghikai ba ong lai ha uwei kumta ruh ha ka niam kur don kine- u Blei, ka Blei bad ki Blei.
Dei kane ka durbar blei kaba rai ban don ka jingpynlong, kumta na kane ka durbar blei ka la mih ka hukum ba ki ong ka hukum blei. Ka kyntien hukum ka mut ‘kohnguh kumba la buh’. Bad ka hukum ba la mih nyngkong eh dei ka hukum kaba ong ‘long’ bad kane ka hukum ka la mih da ka jingsawa kaba jur bad khlaiñ tam na ka ïing durbar blei lyngba ka dwar blei sha khrum ka bneng.
Ka jingpet ka kdumhawhaw (origin of the cosmos): Ha khrum ka bneng la ong ba don u mawsiangbneng uba ïar bad khraw kat ka jingkhraw ka kdumhawhaw hi. U ne u mawsiangbneng u bthei u pait u pra ha kato hi ka khyllipmat ba mih ka hukum blei da ka jingsawa kaba jam “long”. Katkum ka kyïan physics la batai ba ki kther jingsawa (sound waves) ki don ka jinglah bad ka bor ban pynpait wat ïa ka biar, ka ïit rben bad wat ki kynroh lada ki kther jingsawa ki mih ha la ki jong ki jingkhlaiñ(different wave length strength). Kumta kumta hi kata ka khrum bneng baheh baïar ka la dap da ki jingbthei bapur bad baper bad na kine sa long ki khlur, ki sngi, ki bnai, ki metbneng, ki phngit, ki kynja lyoh bad ki puipui. Dei na kane ka jingbthei bapur bad baper ba sa mih ka kyntien ‘pyrthei’ kaba mut ba la long na ‘ka jingbthei bapur bad baper’.
Ka khana ha ki thaiñ Sohra ka ïathuh ba ka talwiar sngi kam pyllun hynrei ka wan dur kum ka pylleng. Dei na kane ka jingsngewthuh ba ki ïingshong hyndai ka dpei barobor ka don hapdeng jong ka ïing, kumba don ka khangai hapoh pylleng, bad ka dur jong ka ïing baroh kawei ka wan dur kum ka pylleng bad ïa kane phi lah ban lap sabut phrong (ruins) ha Twahlongwa, ka shnong ka bym don shuh mynta sah sa tang ka jaka bad ka kyrteng.
Ki khana hyndai ki ïathuh ïangi ba ïa ka pyrthei la pynlong da u maw ba la pra jong u mawsiangbneng. Kumta ka pyrthei baroh shityllup ka dap da ki maw suda bad ka long khohruh khohram. Kane ka jinglongmaw ka pyrthei ka pynmih shibun ki kyrteng shnong kyrteng jaka ba la sdang da kyntien ‘maw’ na khmat. Ka long kaba sngewtynnad ba ki pyrtuitthaw (toponyms) ba sdang da kyntien maw na khmat ki bun ha Ri Hynñiewtrep ban ïa kiwei kiwei ki kyrteng shnong bad ka don ruh ka khanatang balei bad kumno la pyndonkam ïa ki maw.
Ha kaba ïadei bad ka dur ka pyrthei ki mynkulong ki ïathuh ba ka wan dur salon (spherical) kaba mut ‘sa pyllon’. Ïa ka jinglong salon ka pyrthei la batai ruh da ka kyntien sohmyndur ha kaba ‘soh’ ka don jingïadei bad ka rukom wan dur (shape) ha ka rukom ba pyllon, ‘myn’ ka mut ka um kumba ju khot Mynngot, Mynriah, Mynriang, Myntdu terter bad ‘dur’ ka thew ïa ka jingwandur. Namarkata sohmyndur ka mut ‘ka met um ba wandur kum u soh’. Kane ka pyni ba ki hyndai ki tip ba ka pyrthei ka long salon kum u soh. Ïa kane ka jingsngewthuh jong ki hyndai ïa ka jingwandur salon ka pyrthei bad kiwei ki metbneng lah ruh ban tip na ka jingshtahdur ïa ka sngi ha uwei u mawbynna u ba don haneng Rangsohkham. Ïa kane ka dur sngi ba la shtah ha u maw la khot u Mawsngi.
Ka Pyrthei: na ïitkhmih ki deiriti (the earth, a cultural perspective): Kumba la batai ha shwa, ka pyrthei ka long da ki maw khohruh khohram suda bad ym don kino kino ki jingim ba mih ha ka. Ïa kane ka khohruh khohram la khot ka Ram-ew. Ka kyntien Ram-ew ka mut ka at ka them, ka khohruh khohram, ki thliew bad them bad ka wan na ka ‘khohram bad thliew’. Ka Ram-ew ha kum kane ka jinglong ka la kyrpad ïa u Blei ban ai ha ka ïa u nongpynkha u nongpynroi. Kumta u Blei u la ai ha ka ïa u tnga uba kyrteng u Basa. U Basa naduh kata ka por u la sa, (‘sa’ ka mut ka jingtreikam ba shapoh jong kano kano ba kynja met, ka jingtreikam bym lah ïohi) bad u Basa u la kynrang ïa ka na shapoh bad na kane ka jingsa bad jingkynrang u Basa ïa ka Ram-ew na shapoh la pynkha ïa san ngut ki khun, ka sngi, u bnai, ka lyer, ka um bad ka ding. Shen hadien kata ka Ram-ew ka ïap noh. Ki khun heh baroh saw ngut ki ïaleh ban pynkhuid ïa ka ba sah jong ka kmie. Ka sngi ka la pyrshang pynkhuid pynban kaba sah jong ka kmie ka shu pyrdung bad tyrkhong. U bnai ruh u la pyrshang pynban um lah pynkhuid shu daitthah slamslam. Hadien la pyrshang sa ka lyer, kane pat ka shu beh pynsma iewtung baroh sawdong. Nangta la pyrshang sa ka um, kane ruh kam lah, ka shu kyrthlap narud wah narud duriaw, kumta kam lah. Khadduh, ka ding kaba long ka khun khlieng kpoh ka la pynkhuid phar ïa kaba sah jong ka kmie haduh ban da kylla dpei. Dei na kane ka jingjia ba don ha kane ka khana ba ha ka niam kur ïa kaba sah jong kiba la ïap ki thang, khnang ba ka dpei kaba mih na ka ba thang kan long biang ka bynta jong ka pyrthei ban shah ktah ruh ha ki bor ka mariang.
Kine ki hynmen jong ka ynda haba ki la ïohi ba ka para khadduh jong ki ka la pynkhuid ïa kaba sah jong ka kmie ki la bitar bad ki la shla ban pynïap bad pynduh jait syndon ïa ka. Ka ding haba ka la tip ïa kane ka phet rieh ha ki dieng ki siej hynrei ka lyer ka kawut bad rat ïa baroh ki dieng ki siej, nangne ka ding ka kynthih bad ngam sha ki maw. Ka um ka ïaleh ban pynlip ïa ka ha ki maw pynban mih u khynñiuh, u jumai bad kreiding (volcano). Na ñiamra ki maw ka ding ka her sha ki puipui ka suiñ hynrei ka um ha ka dur ki jynhaw um ryngkat bad ka haiñ (temperature) jong ka sngi ki ïaleh ban pynduh jait ïa ka hangta hynrei mih pynban da ka leilieh bad u pyrthat. Kine ki jingïaleh shipara ki neh haduh kine ki khyllipmat bad na kine ki jingïaleh la pynlong ïa ki syrtap khyndew bad ïa bun bah ki jait jingim kum ki khñiang ki ksiah, ki mrad ki mreng, ki dohkha dohpnat, ki sim ki doh, ki phlang ki kynbat, ki syntiew ki skud, ki dieng ki siej bad kiwei kiwei de ki jingim bad kane ka pynlong ïa ka Ram-ew ban khie im pat, namar ïa ka Ram-ew la pynlong na kaei kaei kaba kynja bneng bad kano kano kaba kynja bneng (divine) kam ju ïap. Mar ïa im biang ka Ram-ew ka pynbeit ban don la ki aïom ïa ki jait jingim ban mih bad im katkum ka aïom.
Ynda ka Ram-ew ka la khie im pat ha ryngkat ki jait jingim bapher bad u Basa u ba ïai kynrang ïa ka na shapoh, ka la kyrpad biang ïa u Blei ban phah nongsynshar bad nongkorbar halor jong ka bad halor ki jait jingim baroh. Na kane ngi sngewthuh ba u Basa u ïai long u tnga jong ka u ba ïai kynrang ïa ka na shapoh ban pynim bad pynkhie im ïa ki jait jingim bapher katba u bynriew pat u long u syiem nalor jong ka halor ki jingim baroh bad kine ki neh haduh mynta.
Kumta u Blei, lyngba ka durbar blei, na ki khadhynriew bynriew ha bneng, u la phah lyngba u sohpetbneng hynñiew bynriew sha kane ka sla pyrthei ha ki por ba dang lung ka sngi u bnai ban long kynrad ha sla pyrthei. U la ai ruh ha ki ïa ka ktien kren, ka aiñ bad ka hukum. Lyngba ka ktien kren u briew un tip ïa u briew bad ïa u Blei, lyngba ka aiñ u briew un tip ïa ka tip kur tip kha bad lyngba ka hukum un tip ïa ka kamai ïa ka hok. Kine ki la long ki mynkulong banyngkong tam ha pyrthei. Ïa ki khyndai ba sah ha bneng la tip kum ki khyndai haneng
U Sohpetbneng: Ka kyntien sohpetbneng ka don lai kynnoh ha kaba ‘soh’ ka mut uei uei ba kynja soh (fruit), ‘pet’ ka mut ka tynrai mih bad ha ka Phareng ki ongoriginate lane evolve bad ‘bneng’ ka mut kaei kaei kaba maïan (divine). Ka jingmut ka long ba u briew u la soh u la pet na kaei kaei kaba maïan. Namarkata, ha ka lehniam jer kyrteng ki ju ong kine ki kyntien ‘ban long syntiew, ban long soh bad ban long symbai’ ki kyntien ba thew ba u bynriew un nangroi nangbun parum pareh.
Sa kawei ka jingmut ka long ba kane ka kyntien ka don ar kyntien, sohpet bad bneng ha kaba ‘sohpet’ ka mut u tyllai doh ba pynïasoh ïa ka plakhun ka kmie bad I khyllung ba la seng bad pun hapoh bad ‘bneng’ ka mut maïan. Ha ka Phareng ïa u sohpet ki ong umbilical cord bad ïa kaba kynja bneng ki ong divine. Kumta sohpetbneng ka mut u sohpet ba maïan bad ha ka Phareng ki ong divine umbilical cord.
Ïa ka jingmaïan u sohpet ngi lah ban sngewthuh da ngi ïohi por ba ot sohpet da la kha ïa I khyllung. (Ym ju ot sohpet da kynja nar kum ka tari, wait ne khanshi, hynrei ki ju ot sohpet da ka phlit siej ba la syang, ha kane ka juk mynta hap ai tetanus injection shwa ban kha). Ngin sngew phylla ban pyrkhat ne mutdur ba kumno ba ka mynsiem bad jingim kan rung lyngba ine I sohpet bad kumno I khyllung I ïoh bam bad pynmih jaboh katba I dang don hapoh ka kpoh jong ka kmie. Ha kane ka juk mynta la lah ban ringdur shondur ïa ka rung bam bad mih jakhlia lyngba u sohpet hynrei ym lah da leilei ban ringdur shondur kumno ka mynsiem bad jingim ka rung lyngba u sohpet. Kumta ngi sngewthuh ba sohpetbneng ka mut bad thew ïa kaei kaei ka bym lah ban ïohi da ki khmat ne ktah da ki kti, ka long ka kyntien ba don tang ha ka jingmut, jingpyrkhat bad jingsngewthuh.
Kane ka long ka jingmaïan bakhraw ba ki mynkulong ki ïakynduh bad dei na kane ka jingmaïan longbriew jingmaïan wan I mynsiem briew lyngba u ksai sohpet ba pynsnoh ïa ka plakhun bad I khyllung ba ngi sa ïoh ïa ka kyntien sohpetbneng. Ïa u sohpetbneng la ñiew ruh da ki mynkulong kum ka jingkieng ksiar ha kaba ka mynsiem ka hiar por ba pun bad ba ka mynsiem ka kiew da la ïap ban bam kwai ha ïing u Blei. Hynrei ka mynsiem jong kito ki bym kamai ïa ka hok ka hiar sha ki khyndai pateng ñiamra. Dei na kane ka daw, katkum ki jinghikai ba nga la ïoh na ïing, ym ju shah ïa ki para bad pyrsa kynthei ban shna ne pynkiew jyndeng ksiar thymmai ha ka met ne ban die duh ne bynda jyndeng ksiar ha ka por armet lym kumta ki ïoh pang bad swai khlem lap ïa ka daw jingpang namar imat ka ksiar ka don jingktah aïu re kaba maïan ïa I khyllung ha kpoh. Da la ïap ïa jyndeng ksiar ba deng man la ka sngi ha met ki thang lang bad la tam ei da ki nongkylla thang.
Ka kyntien Hynñiewtrep ka long ka kyntien ba la pynkynmaw da u myllung Soso Tham bad ka long ka kyntien ba wan hadien ki Hynñiewhapoh. Ha kito ki por ba ki mynkulong ki wan poi nyngkong sha sla khyndew ka jaka shong jong ki ka long ha synrang maw ha khlaw ha btap. Ynda ki la nang shna ïing da ki phlang, rshiang, traw ne tynriew la tip pat ïa ki Hynñiewhapoh kum ki Hynñiewtrep.
Ka long kaei kaei kaba phylla ba ki dakñiew (number) kum uwei, ar, lai, hynñiew, khyndai, khadar terter la pynïasnoh da ki mynkulong bad ki bor bym lah ïohi ba don jingïadei bad ka kdumhawhaw (cosmos) shabar ka pyrthei bad ki bor mariang sawdong u briew da kaba ngeit ba kine ki dakñiew ki ktah ïa uwei pa uwei u briew. Kumta, man ka por ba u briew u pang ne ngat ha kano kano ka jingjynjar ki ju leh ïa ka shat ka kheiñ (measurements and calculations) ha ka diengshat ban lap ïa ka daw ne jubab (answers). Kane ka pyni ba ha kano kano ka kheiñ ka diah (calculations) donkam ïa ki dakñiew (numbers).
Namarkata, kine ki saiñ pyrkhat shaphang u Blei, ka Durbar Blei, u Sohpetbneng bad Hynñiewtrep bad kiwei ki rukom pyrkhat ba mih ki pynpaw ba ki mynkulong ki ngeit ba don u Blei bad ba baroh kiei kiei ba ngi ïohi ki long ba la thaw da u Blei.
Khnang ban pynsnah ïa ka jingngeit jong ki ba don u Blei bad ban bud ïa ki jinghikai niam, ki mynkulong ki pynsnoh, pynskhem bad pynngeit ïa ki longdien da kaba thaiñ khana ha u lum bakynjang tam ha ki por hyndai mynkulong u ba ki ai kyrteng u LUM SOHPETBNENG. Ban kham ïa shai u SOHPETBNENG u long ka dak jingpyrkhat ba pynpaw ïa ka jingngeit bad jingsngewthuh ba don u Blei, ba don ka jingïadei u briew shimet shimet bad u Blei. Bad ba U LUM SOHPETBNENG ba don ha sla khyndew ka Ri Bhoi, u long tang kum ka dak ïa kata ka jingngeit u paid Hynñiewtrep. Bad ka jingong ba U LUM SOHPETBNENG u long u pdeng jong ka pyrthei u Hynñiewtrep kam shym bakla namar u sohpet u don hamar pdeng ka khlieh bad kjat u briew.
Hyndai ka ju don ka jinglehniam ha khlieh u Lum Sohpetbneng bad shwa ban kiew ban pynlong ka jinglehniam ha khlieh lum ki pynlong shwa ka shat ka kheiñ ha ki maw lyngknep ba don ha kjat U Lum Sohpetbneng la ka long ibit (auspicious) ne em. Ïa kine ki maw la khot ki mawkhan bad la ïoh kyrteng shnong Mawkhan na kine ki maw. Katto katne ki mawkhan dang lah ban ïohi ha phyllaw jong ka CASA.
Kane ka long kata ka khana shaphang ka jingpynlong ïa ka kdumhawhaw (cosmos) bad ïa u bynriew, ki jingim bad bun bah ki jait jingpynlong. Kane ka khana ka la ngam tynrai bad la long doh long snam bad ka long kum ka ïitkhmih jong ka jaidbynriew ba pynpaw ïa ka jingsngewthuh ki mynkulong ïa ka jingdon U Blei bad ïa jinghikai ba ngin im tipbriew tipblei, tipkur tipkha bad ban kamai ïa ka hok, ba kumba ka mynsiem briew ka wan lyngba u sohpet ba maïan jong ka kmie kumta ruh ka mynsiem kan leit kiew da la ïap lyngba u sohpet ba maïan u ba ngim lah ïohi- u Sohpetbneng.