Press "Enter" to skip to content

Ka Election Commission: Ka jingshah kynthoh

Ka Election Commission of India kadei ka bor kaba pynïaid ïa ki election ha ri India, khamtam ïa ki election sha ki ïingdorbar Thawaiñ jong ki jylla ne ki Legislative Assembly bad ka ïingdorbar Thawaiñ jong ka ri, ka Parliament. Kane kadei ka bor kaba la thung bad ithuh da ka riti synshar jong ka ri India bad ka don ka bor kaba khlaiñ bha ban the lakam khnang ban wanrah ïa ka election kaba ïaid beit ïaid ryntih. Kane ka Commission kadei ka bor kaba laitluid, kaba ki bor sorkar ne ki Political Party wat lada ki khlaiñ bor katno katno ruh, ki hap ban sngap ïa ka.
Katba nang ïaid ki por, ka Commission ka la nang wanrah ki rukom treikam kiba kham khlaiñ. Dei ha ka por ba long Chief Election Commissioner (CEC) u TN Seshan ba kane ka Commission ka la paw bha ka jingtreikam, ha kaba u la wanrah ki jingtreikam kiba pyrkhing bha, kynthup ïa ki Model Code of Conduct ba ki Political Party bad ki Kyrtong ïaleh elekshon ki hap ban bud. Ha ka por jong u Seshan ka Commission ka la khyrwit tyngeh ïa ki Party bad ki kyrtong kiba leh bym suidñiew ïa ki jingbthah ka Commssion. Uwei pat u CEC uba la pyntreikam bha ïa ka bor jong ka Election Commission udei u Bah JM Lyngdoh, u heh duh ka Commission u la paw bah ha ka por ba u la khyrwit tyngeh ïa u Narendra Modi ha ka por ba u dang long u Myntri Rangbah ka Gujrat, namar ka jingjah kyrteng kiba bun ki nongthep vote Muslim hadien ka jingïaumsnam na ka Godhdra . U Seshan bad u Bah Lyngdoh, la ju tip ba kidei ki briewk bym ju salia satia ïa ki Political Party ne ki Politician bad ha ka por jong ki, ka election ka long kaba ïaid beit ïaid ryntih bha.
Hynrei ha kane ka election Lok Sabha ba mynta kaba dang shu sdang ha ka 11 tarik, la ïohi ba ki Political Party bapher bapher ki la beiñ ïa ka Commission namar ka jingtreikam ba lam shah shiliang jong ka, khamtam sha ka seng ba don ha ka bor synshar. Ym pat ju don ha ka history jong ka ri India ba ka Commission kan shah beiñ bad shah kynnoh haduh katne kumba long mynta. Ka Commission ka la shah ther tyngeh ha ki Liang Pyrshah haba ka la shah ïa u Myntri Rangbah duh ka ri, u Narendra Modi, ba un kren sha ki paidbah lyngba ka Television ha ka sngi ba la pynher ïa u sattellite, kata ruh hadien ba la pyntreikam ïa ka Model Code of Conduct. Nangta ka jingrai jong ka shiphang da kumwei shiphang da kumwei ha kaba iadei bad ka jingpyllait ia ka phlim jong u Modi bad ka jingbym khang jong ka ïa ka Channel na ka bynta jong u, ki la pynbitar ïa kiwei pat ki Political Party.
Ha ki election baladep ha jylla Andhra Pradesh bad Telengana, ha kaba la synshar da ki Seng bym dei na ka Party ba don ha ka bor synshar ha Delhi, la shem ba da ki spah ngut ki kyrteng jong ki nongthep vote ki la jah klep, khlem tip namar kano ka daw. Ha kiba bun ki jaka ki kor EVM kim shym la treikam bha bad don ki jaka lei lei kiba lada vote sha kawei ka Party, ka poi pynban shawei.
Ha kane ka jylla la ïohi ba ka don kawei ka case, ha kaba u Myntri ka koit ka khiah, uba dei uMLA ka BJP, u la leit ïalap elekshon da ka kali sorkar, ïa kaba ki kyndon ka Model Code of Conduct ki khang pyrshah. Hynrei ym shym la leh eiei ïa u la shu ai tang ka jingmaham. La ïohi ruh ba u kyrtong ka BJP na ka bynta ka elekshon Lok Sabha, u Bah Sanbor Shullai, u la ai interview ïa ki Press ha jaka thep vote syndon, kaba long kawei pat ka jingpynkheiñ ïa ka MCC. Kane ka kam ka dang sah ha ka jingtohkit. Hynrei kata ruh ka I long jem palat, namar kat kane ka jingpynkheiñ bad khamtam eh ka jingbym kheiñ briew ïa ki ophisar ba pynïaid election, lah dei ban leh wut wut.
Kine ki jingshah kynthoh ka Election Commission, lada kam lah ban pynbeit, ha kawei ka sngi kan duh jingshaniah na ki paidbah kum kata ka bor kaba lah ban pynïaid beit pynïaid ryntih bad ki paidbah kin peit ïa ka da kumwei pat bad ka lah ban duh nih ka jingshaniah na ki paidbah.