Press "Enter" to skip to content

Ïoh shondur ki Saïantis ïa ka Krem-lamet krem-latang

H.H.Mohrmen

Ha u snem 1989-90 haba nga don shabar ri, nga la ïoh pule ïa ka kot saïan hynrei kaba la thoh khnang ba ki riewpaidbah kin suk ban sngewthuh ba la thoh da u Stephen W. Hawking kaba kyrteng ka “A Brief History of Time: from Big Bang to Black Holes.” Kane ka kot ymtang ba kala ktik ïa ka jingmut jong nga ba ngan sngewtynnad ïa ka tnat pule kaba ïadei bad ka haw haw (Cosmology), hynrei dei lyngba kane ka kot ba nga tip nyngkong shaphang kita ki black holes ne ki thliew ba ïong ba don ha ka haw haw.
Ym kum kiwei ki jaitbynriew kiba la kiew haka jingstad khlur bad shaphang ka sahit bneng bad ka haw haw bajylliew, ha ka jingshemphang jong ki kpa tymmen jong ngi, ki tip tang ïa ki khlur; u lur step; u lur miet, u lurdih duma, ka sngi, u bnai bad ka jingmih; jingsep jong u bad kata ka jingtip ka long kaba khyndiat bha. Hynrei mynta lyngba ka jingkiewsted jong ka jingstad saïan, ngi tip ba ha ka haw haw, Universe nalor ki metbneng kiba shad tawiar ïa ka sngi kiba don ha kata ka solar system ne ka lyngwiar ka sngi, ki don ruh sa kita ki galaxy, ki black hole bad kiwei kiwei.
Ka galaxy ka dei ka jinglumlang jong ka lyer gas, ki pui-pui bad ki billion ki khlur bad kumjuh ka lynwiar ka sngi jong ki ha kawei ka jylli-bah kaba heh. Kum ka nuksa ka lyngwiar ka sngi kaba ngi don, ryngkat bad ki billion ki khlur, ngi don hapoh kawei ka jylli-bah ki khlur (galaxy) kaba ki khot ka ka milky way. Bad ki riewstad saïan ki ngeit ba haka haw haw ka jong ngi ki don da ki spah billion tylli kita ki jylli-khlur. Ka lyngwiar-ka sngi jong ngi kaba kynthup ïa ki 8 tylli ki met bneng kiba shad tawiar ïa ka sngi; kala heh lypa, hynrei nalor kane ka (solar system) jong ngi, ryngkat bad ki billion ki khlur ka don pat hapoh ka jylli-khlur kaba ki khot Milky way. Nangta ki don sa da spah billion tylli ki jylli-khlur (galaxy) ha ka haw haw, hato ngi dang lah ban mutdur ïa ka jingheh bad jingjylliew jong ka haw-haw?
Ki liewlep-ba-ïong (black holes) pat ki dei kita ki jaka kaba ym don iwei ruh ba lah ban lait naka jingkhring jong ka, wat ki kjat jingshai ruh kim lah satia ban ksam lyngba jong ki. hynrei wat lada la khot ïa ki thliew hynrei kim dei pat kiba thylli; ha ka jingshisha hapoh jong ki ki don ki met kiba la thynñian bha ha ka jaka kaba rit bha. Dei kane kaba la pynmih ïa ka bor khring shalade (gravitational pull) kaba khlaiñ bha ha kine ki liew-ïong. Ka don ka bynta ha kane ka liew-ïong ba ki khot event hoizon kaba shisien bala rung hapoh u ang jong ka, ym don lad shuh ban lait naka jingkhring jong ka. Kine ki liew-ïong ki khring shalade kat ïa kiba don hajan jong ki, kynthup ïa ki metbneng bad ki khlur ruh.
Haka sien nyngkong ba nga pule shaphang kita ki black holes, ka jingmut ba nyngkong kaba wan shat ha nga ka dei ka jingïathuhkhana shaphang ‘ka krem-lamet ka krem-latang’, ka krem sha kaba ka sngi ka leit ban phetrieh naka pyrthei. Nga pyrkhat halade bad pleng ngi ruh ngi tip shaphang kita ki black hole, hynrei kita ki liew-ïong kim ïadei satia bad ka khanatang jong ngi.
Ki don bun tylli ki liew-ïong haka haw-haw, hynrei ka jingheh jong kane kaba la shondur ka long 40 billion km, kaba mut ba ka dang heh lai millian shah ïa ka pyrthei jong ngi. Ka jngai kumba 500 millian trillion km na kane ka pyrthei. La shondur ïa ka da kaba pyndonkam ïa ki phra tylli ki dorbin-peit-khlur kiba la ïa pynïasnoh lang kylleng ka pyrthei (Even Horizon Telescope). Kata ka black hole ka don ha kata ka galaxy kaba ki khot M87 bad ka dang heh palat ban ïa ka lynwiar jong ka sngi. Ka dang heh ruh 6.5 billion shah ïa ka sngi bad ka dang khamshai palat ban ïa ki billion tylli ki khlur kiba don haka galaxy bad dei namar kata wat ba la ka don jngai bah naka pyrthei ruh, dang lah ban ïohi ïaka
Kam don satia ka telescope kaban khlaiñ haduh ba kan lah ban shondur ïa ka black hole tang dalade hi bad dei namar kata ba la pyndonkam ïa kiba buntylli ki dorbin peit khlur. Kumjuh ruh ki don 200 ngut ki saïantist ba ïashim bynta ha kane ka kam bad ka shimpor ïa ki 10 sngi tang ban shondur ïa kata ka liew-ïong. Hadien bala dep shondur ka jingeh pat ka long ba kine ki dur ne ki data (jingtip) ki don ha ki spah tylli ki hard drive ne kor buh jingkynmaw kiba hap ban pynwanlang ïa ki ha kawei khnang ban ïoh ïa kata ka dur kaba pura kaba kila angnud.
Dei hangta ba ka Katie Bauman ka ’stad korputar ha ryngkat ki paralok jong ka, da ka rukom kheiñ algorithm kila lah ban pynlang ïa baroh ki jingtip na kita ki spah tylli ki kor buh jingkynmaw bad haka sien kaba nyngkong la lah ban pynmih ïa ka dur jong ka black hole kaba ym pat ju don ba ïohi mynno mynno ruh. Kane ka dei ka jingjop kaba khraw jong ka saïan haka jingpyrshang ban sngewthuh bad ban lap ïa ka tynrai jong ka haw haw.