Press "Enter" to skip to content

Kyntu PWD ka TULBA ban maramot ïa ka surok Zero Point-Nongmahir

Shillong, Ïaiong, 16: Ka The Ultimate Legend Bikers’ Association (TULBA) Ribhoi District ka la dawa ïa ka tnat PWD jong ka Sorkar Jylla ban maramot noh mardor ïa ka jingsniew palat ka surok na Zero Point sha Nongmahir, kaba jrong kumba 20 kilomitar bad kaba hap ha Umsning Constituency kaba la ktah haduh katta katta ïa ka leit ka wan jong ki paidbah ha katei ka thaiñ.
Ha kajingïakren bad u Vice-President ka TULBA Ribhoi u Bah Aibansuk Sylliang u la pynpaw ka jingsngewsih ban ïohi ba ha ki jaka nongkyndong ba ka Sorkar Jylla kam lah ban pynbha ïa ka surok kaba la buh jingeh ha ka leit ka wan ka kit ka bah.
“Ka Seng ka la lap ïa kane ka jingsniew ka surok ka dei ha ka por ba ki leit shangkai da ki thuk thuk sha kane ka dewlynnong kaba don hane ka thaiñ ha ka 15 tarik mynta u bnai,” ong u Bah Aiban.
U la ong, bun na ki paidbah kiba leit shangkai sha kane ka jaka ki sngewdiaw watla ka jaka ka long kaba itynnad ruh.
U la ong ba ha kane ka Jylla ka jingkyrduh kam ka jur bha bad lyngba kane ka kam jngohkai pyrthei u ngeit ba ka lah ban plie ki lad ai kam ïa ki khun samla bad ha kajuh ka por kan wanrah ruh ïa ka jingïohnong ïa ka Jylla hi baroh kawei.
Namarkata, ka Seng ka kyntu ïa ka tnat PWD bad kumjuh ruh ïa Nongmihkhmat ka Umsning Constituency u Bah Jason Sawkmie Mawlong, ban shimkhia bad maramot noh kloi katba lah ïa katei ka surok shwa ban wan ka lyiur.