Press "Enter" to skip to content

Nang jyllei ki kam tuh

Kat shaba phai mynta iohsngew beit ïa ka jingjyllei ki kam tuh ki kam thied, ha kaba ki ïing briew ki shah prong shah khlong bad u nongtuh u nongthiem, u rong u rah lut kat ba iohi ka khmat bad kot ba kot ka kti, kampher lada dei ka ksiar ka ksah, ka pisa tyngka, ki mar ba rem dor bad kumta ter ter, kaba kham phylla pat ka long ba ha kiba bun ki khep, u nongtuh uba juh leh ïa kine ki kam, u dei uba shalak bad ba spel lyndet ïa kano ma kano ka ïing kaba u da tip ba ki trai ha katta ka sngi ne ka por ba u prong tuh ïa ka ïing, kim don satia, lehse ka lah ban long ba ki leit sha la ki kam ki duk, ne ki leit kham jngai bah na laka jong ka ïing ka sem kaba ki shong ki sah.
Shano pat ki mentuh ki buh ïa kine ki tiar, hato ki dei tad ïa ki sha kino pat ki jaka, kumno ki rah ki rong na man na ki thliew ïing ba ki tuh, mano ba juh thied ateng pat ïa kine ki mar tuh, hato ka dei ha kane ka nongbah, ne sha kiwei pat ki jaka kiba ym lah ban kot ne iohi shuh da ki khmat jong kita ki trai kiba la jia ka shah tuh shah thiem na ka ïing ka sem ka jong ki.
Bunsien lah ban ong haba ki mentuh u prong, ka dei namar ba I kwah palat ban kynjoh kloi sha ka kamai spah bym hok, u kwah palat ban ioh kham ïa ka tyngka ha la ki jong ki ksang kti, um kot ka bor pyrkhat da kaba trei minot ne ban pynshitom ïa la ka jong ka met, hynrei ka jingim ba alhia ba jaipdeh, kaba shu phohsniew da ieng ba shimiet shimiet ban ioh ka kamai suk ha ka jingim, ka pynlong ïa u briew ban kdat sha ka jingim da kaba shu tuh shi thiem na ki thliew ïing jong ki briew. Kane shisha ka pyntieng ka pynsmiej ba ha ha kine ki sngi ki por kiba mynta, namar ym shngaiñ shuh ban shu ieh lyndet ïa la ka ïing ka sem, ka pynduh thiah ka pynduh dem, ïa kito ki long ïing kiba don ïa ki mar ba remdor ha ki ïing ki sem ki jong ki, kampher wat hadien ba la pyrshang ban ker ban da bha ïa la ka ïing ka sem, hynrei u nongtuh ruh u tip bad shalak da kumno ban pydonkam ïa ki tiar ban lah ban lied suk ïa ki ïing ki sem jong ki briew.
Haba phai sha ki bor jong ka aiñ, ki dum ka buit ki dum ka stad naba katba nang mih ki sngi, ka jing jyllei ki mentuh kam dei shuh kaba kai, man la ki dong ki shnong na ka por sha ka por, ki hap ban leit ban wad ïa ka daw, hadien ba ki la ioh ïa ki jingujor na ki longïing ba la ngat ha ka shah tuh ka shah thiem ha ki ïing ki sem ki jong ki.
Hynrei ka daw tynrai ïa ka jinglong ba shalak bha ki mentuh ka long ba bunsien ka juh dei na ki longïing ki longsem kiba da ki bun bun ki kynta ïa ka ïing ka sem ka jong ki la shu ieh tang ha kita ki nongtrei ïing ki jong ki, kane ka long lypa kum kawei na ki buit kaba ki nongtrei ki lah ban dei ki briew kiba hok eh, pynban ki ngat pat ha ka jingshah pynshoi ha la ki jong ki paralok. Ki nongtrei ïing kiba kham ma eh lei lei kidei kito ki jaidbynriew ba wan na kiwei pat ki jylla ba marjan, namar ha ka jingia pur khana sngew saong ba ioh ban trei ha ki ïing paki ki ïing dulan, ki paralok ki kloi ban pynshoh biej da ki kyntien ban pynshoi ïa ki ban ïarap ha kaban rong tuh ïa ki tiar ki tar na kum kine ki long iing ki longsem.
Kham bunsien ïa ki tiar ba ki mentuh ki la rah ne rong na ki thliew ïing na ka nongbah, kham ñiar ban lah ban lap ne ban ioh kurup biang ïa ki na kane ka nongbah, imat bunsien shisien ba la ioh ban rong, wut la kit la bah pynsted ïa ka sha kiwei pat ki jylla ba marjan, ha kaba la lah ban die pat ïa ki sha ki paidbah bym tip tikna nangno sha ba ki tiar ba rem dor, ban lah ban ioh ban thied tang kumba mar shiteng na ka dor ïew dor hat.
Kumta ka long kaba donkam ïa ki paidbah haba ki rai ban ieh ïa la ki ïing ki sem ki jong ki ha kum kane ka juk kaba mynta, kin hap ban long kiba phikir kiba peitngor bad ban nym kheiñ sting ba ha ki briew ba tang shi sngi ban shaniah lut, dei ban long kiba peitngor bha ïa ka rukom ïaid rukom ieng jong ki nongtrei, hap ban khanglad ïa ka jingwanrah paralok sha ki ïing ki sem ki jong ki, dei ban buddien bha ruh ïa ka ïaid ka ieng, ka kren ka khana jong ki, kaba donkam lei lei ka long ba ïa ki nongtrei ïing briew khamtam lei lei ïa kito kiba wan na kiwei pat ki jylla hap ban da buh ïa ka dur ka dar ka jong ki, ban wad bniah ïa ka jaka shong bad sah kaba pura ka jong ki, na kano ka jylla ba ki wan, namar kham bunsien, wei haba la ngop lei lei ha ka dor kaba tad, tang katta la dei lypa ban sngewthuh ba sha lyndet ka ïing ka sem ka jong ki shisien ka sngi kan nym lait ban shah rong lut kaki tiar ki tar ba remdor ki jong ki ha kum kine ki briew ba shisngi.
Lada long lypa kiba peitngor ïa kiei kiei baroh naduh kaba sdang, shi ban ka la wanrah ïa ka jingshngaiñ lypa ïa la ka jong ka ïing ka sem, tangba wat la katta ruh wat kheiñ sting wat nym ngop ha ki ktien jali ba jail, ha ki kam ba ki pynpaw ki riew shi sngi, donkam ban phikir ba ki kamra ba la buh ïa ki tiar ba rem dor kidei ban long kiba skhem bad kiba lah ban khang tala bha ïa ki, ha kaba ki por ba leit trei leit ktah ïa kum kine ki kamra donkam ban da phikir naka bynta ban khang skhem bha ïa ki, nalor katta hakhmat jong ki nongtrei kiar ha kaban pyni ne ban pynpaw ïa ki jingdon ki mar ba remdor, hap ban burieh bha ïa ki ne ban nym ailad ïa ki ban tip ba kum kine ki tiar kidon ha ki ïing ki sem ki jong ki.