Press "Enter" to skip to content

Plie ka KJP Mihsngi Sec. School Pongtung ïa ka Hostel ki kynthei

Shillong, Ïaïong, 16: Ka KJP Synod Mihngi Secondary School Pongtung mynta ka sngi baar ka la plie ïa ka Hostel ne ka jaka sah jong ki khynnah Kynthei kiba pule ha kane ka skul kiba sah sha ki shnong kiba kham jngai na kane ka jaka pule.
Ïa kane iing, la plie da u Moderator jong ka KJP Synod Mihngi u Rev. BB Lamin uba la long u Kongsan ha kane ka jingïalang ryngkat ka jingïadon lang kiwei de ki Pastor jong ka Balang Presbyterian.
La pynïaid ïa kane ka jingïalang da u President jong ka Managing Committee jong kane ka skul u Rev H.M Wahlang bad ka jingduwai na u Tbn. KD Mawkon na ka Balang Presbyterian Pongtung.
La ïoh jingkren ha kane ka sngi, na u Moderator ka 12 Balang Presbytery u Rev. KL Tynsong, ka Chairperson jong ka 12 Balang Presbytery ka Kong I Kong S Tynsong, u Block Development Officer (BDO) jong ka Pynursla C&RD Block u Bah B Khanglah bad u Rangbah Shnong ka Shnong Pongtung u Bah R Syiemlieh.
Shwa kane, u Secretary ka Managing Committee, u Rev. D. Nongumjang u la ïathuh ïa ka khana lyngkot shaphang ka jingtei ïa kane ka Hostel ha kaba ki bor pynïaid skul ki la sngewdei ban buh ïa ka jaka sah bakyrpang na ka bynta ki khynnah kynthei khnang ba kan pynsuk ha ka leit ka wan.
U la ïathuh ba la tei ïa kane ka Hostel jong ki khynnah kynthei ha ka 19 tarik, Ïaiong, 2018, ha ka jinglut kaba kot 20 lak tyngka lyngba ka jingïarap kaba la ïoh na u MP ka Lok Sabha na Shillong Parliamentary Constituency u Bah Vincent H Pala bad tang hapoh shisnem la lah ban pyndep ïa kane ka iing.