Press "Enter" to skip to content

Shiphew tylli ki mat jingdawa rah ka Seng Nongrep ha u Dy. CM

Shillong: Ka seng nongrep Hill Famer Union (HFU) ha ka sngi baar, ka la iakynduh ia u Dy Chief Minister jong ka sorkar jylla U Bah Prestone Tynsong ban leit rah ia ki mat jingdawa kiba la mih na ka jingpynlong
ia ka 1st farmer parliament ha ka 4 bad 5 tarik Nohprah 2018.
Ha kane ka jingakynduh ka Seng ka la pynpaw ka jingangnud ba ka sorkar kan pynurlong ia ki jingdawa kiba la buh hakhmat ka sorkar na ka bynta ka jingmyntoi jong ki nongrep hapoh ka jylla.
Ki mat jingdawa ba ka seng ki nongrep ka la buh khmat u Myntri Rangbah Symbud ki long ba sorkar kan buh noh da ka komishon na ka bynta ki nongrep (Famer Commission). Kawei pat ka long ba ka sorkar ba kan pynbna ia u snem 2019 kum u snem jong ki nongrep (Year of the Famers), ban dawa na ka sorkar ba kan thaw noh da ka ain ban khang pyrshah bad mana ia ki nongkhaii kiba ju mylien ban ot kilo be-ain ia ki mar rep.
Sa kawei pat ka jingdawa ka long ban nym khniot bein ia ka dor da kaba pyntreikam ia ka Minimum Support Price (MSP) bad ban thawlad ban pyniaid iew ia ki mar jong ki mar rep (marketing) khamtam ban shalan sha Bangladesh.Kiwei kiwei pat ki mat jingdawa ki long ban mang tyngka kham bun ia ka tnad ka rep ka riang bad ki tnad sorkar kiba iadei bad u nongrep bad ban pynbiang ia ki symbai, sboh, ka um, bad ban pynbiang ia ki stad ban sumar ia ki mar rep haba ka don ka jingiap bam khniang, ban wanrah noh ka ain halor ka rep ka riang (Agriculture Policy, ban pyntreikam noh ia ka Crop Insurance Scheme, ban hikai ki nongrep ba kin pynmih symbai hi ia baroh ki jait mar rep, ban map noh ia ka ram jong ki nongrep bad ban ai jingiarap halor ka jingpynjulor jong ka bor mariang bad ban wanrah ia ki processing unit nalor kiwei kiwei de ki jingdawa.