Press "Enter" to skip to content

Thaw ka KHADC ïa ka komiti ban khyllie ïa ki dulir ki Hima Khasi bad ka Ri India

Shillong, Ïaiong 16: Ka Khasi Hills Autonomous District Council (KHADC) kaa thaw hynne ka sngi ïa ka Advisory Committee ka ban khyllie bad shong bishar ïa ka Instrument of Accession (IOA), Instrument of Merger bad ka Annexed Agreement, kumno ban pynieng nongrim ïa kine ki soskular ha kaban lah ai jingiada ba kyrpang ïa ka Jaidbynriew.
Ïa kane ka Committee bala tip kum ka Advisory Comittee on Legislation & Legal Issues, la thaw da ka Legislative Wing jong ka KHADC hapoh ka jingprat lynti jong u Chairman ka Ïingdorbar Bah Pynshngaiñ N Syiem uba long ruh u Chairman jong ka Committee.
Kiba bun na ki Dkhot jong kane ka Committee ki dei ki Doktor kot kynthup ruh ïa ki Nongïasaid Aiñ bad ki riewshemphang halor ki dulir soskular ba ïasoi hapdeng ki Hima Khasi bad ka Sorkar India hadien ba ïoh laitluid ka Ri India.
U Chairman ka Committee Bah Pynshngaiñ N Syiem, u pyntip ba ka thong ba hakhmat eh jong ka Committee ka long ban prat lynti ha kaban wad ïa ki lad ki lynti kumno ban lah ai ka jingiada kaba khlaiñ ïa ka Jaidbynriew lyngba ki dulir ba ïasoi hapdeng ki Hima Khasi bad ka Sorkar India bad kumjuh ruh ïa ka Sixth Schedule.
“Ka Committee kan pule bad shong bishar ïa baroh ki kot ki sla, ki dulir, ki kaiphod naduh ka Intrument of Accession (IOA), Instrument of Merger bad Annexed Agreement khnang ban pynshong nongrim ha kine ki dulir haba wad ïa ki lad ki lynti ban iada ïa ka jinglong ba kyrpang jong ka Jaidbynriew” ong u Bah Pynshngaiñ.
Kat kum ka jingong jong u, ka Committee kan pule bniah ruh ïa ka Paragraph 3 jong ka Sixth Schedule kaba aibor ïa ki Auto-nomous District Council (ADC) ba kin shna ïa ki aiñ ki kanun ki ban long ki atiar jong ka Jaidbynriew.
Kat kum ki kyndon treikam jong ka Committee, la ong ba ka Committee hadien ka jingshong bishar ïa ki kot ki sla, ki dulir bad ki kaiphod baroh, kan sa phah ïa ka kaiphod sha ka Executive Committee (EC) ka ban ai jingmut bad tyrwa ïa ka EC ba kan leh eiei mardor.
La ong ba ka Committee ka lah ruh ban pynkhreh ïa ka Draft Bill khang baka Executive Committee kan wanrah hapoh ka Ïing dorbar Thaw Aiñ ba kan long aiñ.
U Chairman ka KHADC u pyntip ba kane ka Committee ba dang shu thaw, kan sa shong jingïalang ba nyngkong eh ha ka 23 tarik mynta u bnai hapoh ka Conference Hall jong ka Council.
Ïa kane ka Committee la khlieh da u Bah PN Syiem kum u Chairman, Bah Alvin K Sawkmie Dy Chairman ka Council kum u Vice Chairman bad ki Dkhot ki long u Prof A.K.Nongkynrih, Dr B.L.Nongbri, Dr O.L.Snaitang, Dr Sylvanus Lamare, Bah Erwin K Syiem Sutnga bad Bah Banshantylli Khyriem kiba dei ki Nongïasaid Aiñ, u Bah John F Kharshïing bad u Bah R.W Wanniang. I Member Secretary jong ka Committee i dei ki Kong M Kharkrang iba dei u Secretary jong ka KHADC.